Keeta叫288元壽司拼盤送到變「廚餘」投訴僅賠15蚊

288元壽司拼盤送到變廚餘級賣相

事主於6月2日在Threads帳號分享經歷，指當日見到Keeta有優惠券，決定點叫一份288元壽司拼盤作為晚餐。然而外賣送達後打開餐盒，眼前畫面令佢胃口盡失——原本應該整齊排列的壽司，大部份魚生料已經完全脫離醋飯，全部被擠壓到盒邊堆疊，醬汁更黏滿透明膠蓋，賣相猶如食剩的廚餘. 事主翻查紀錄發現由步兵外賣員負責送餐，而餐廳與住處僅相距約10分鐘路程，令佢更加無奈，直言「唔知係唔係玩嘢」。佢隨即向平台客服反映，點知對方僅賠償15元優惠券了事，事主大呻「真心食唔落」，形容「係今日晚餐GG了」。

網民鬧爆外賣員揶揄壽司變丼飯

事件曝光後，大批網民替事主不值，紛紛炮轟外賣員送餐態度。有人直言「淨係睇幅相，我以為係廚餘或者食剩嘅」，認為情況離譜到難以接受。更多網民以抵死留言揶揄，笑稱「個外賣仔係咪叫做龍捲風？」役、「丼飯唔嚴格嚟講都係壽司嘅一種」、「散裝醋飯及海鮮一份」，有人甚至形容「我買盒Lego佢都係未砌好俾我」。另一邊廂，亦有網民認為壽司本身就不適合叫外賣，「10次有9次會炒埋一碟處理」、「呢啲天氣外賣壽司嘅都係勇者」，建議怕中伏就應該選擇自取，「你唔知送嗰個手頭上接咗幾多張單先去到你府上」。

事主致電餐廳終獲全數退款Keeta承諾加強培訓

最終事主繞過平台直接致電餐廳交涉，成功獲得該筆288元訂單全數退款。Keeta發言人其後回應事件，表示已即時跟進協調，確認訂單已全額退款予顧客。平台強調對配送過程有既定指引，送遞員需將餐盒平放於保溫袋中，運送途中盡量保持平穩，往後將加強送遞員指引及培訓，持續優化配送流程。至於事主就表示經此一役學精了，下次想食壽司一定會選擇外賣自取，唔會再假手於人。