CCTV拍低送貨員遠處掟貨翻滾落地｜買家揭包裹內藏易碎品

CCTV全程錄低送貨員遠距離拋擲綠色包裹

事主在Threads帳號「paul.cheng.33」上載閉路電視片段，顯示事發於6月3日（周三）晚上7時許，一名網購平台送貨員到達事主所住樓層派件. 片段清楚影到，該送貨員並無走近事主家門，反而企喺走廊遠處，將一件體積頗大嘅綠色包裹直接向鐵閘方向拋出，包裹落地後即時翻滾，最終停喺鐵閘前。系統隨即發出「提交成功」提示音，送貨員頭也不回繼續派件，鏡頭範圍以外仲不斷傳出「嘭嘭嘭」聲響，估計其他住戶嘅包裹都遭受同樣對待。事主透露包裹內含玻璃管等易碎品，擔心貨物已經碎裂，怒斥「點解行多幾步都唔得」。

事件曝光後大批網民替事主不值掀起公審潮

事件曝光後，大批網民替事主不值，紛紛湧入留言區開火。不過討論好快出現兩極化聲音，有人同情買家遭遇，亦有人直言網購送貨本身就係「搏命跑單」嘅工種，叫事主唔好期望太高，「你唔係諗住佢會幫你擺到靚靚仔仔呀？冇唔見都偷笑啦」、「送啱地址都要還神啦」。更有過來人踢爆，貨物喺整個運輸鏈早已經歷多番粗暴對待，「出貨嗰刻已經掟緊」、「運送途中都唔知扔咗幾多十次，唔差呢次」，叫買家認清現實。

網民踢爆4蚊一件自僱模式逼出暴力派件常態

隨住討論持續發酵，有網民揭露事件背後嘅結構性問題——涉事網購平台大部分送貨員採用自僱模式，薪酬按件計算，每件貨物報酬僅約4元。有留言直指「4蚊件是X但啦」，亦有人解釋「當你做過步兵，一日要跑夠某數先達標嗰陣，就唔會諗咁多啦」、「對佢哋嚟講，快多一秒就係賺到，裏面啲嘢爛咗就話係物流問題，唔使自己賠」。事件最終未有交代包裹內易碎品是否完好，但已揭示出網購物流「以量取勝」嘅自僱制度下，暴力派件幾乎成為行業潛規則，買家想安心收貨，恐怕只能靠運氣。