油塘Cafe夫婦餵完狗做一個動作 連狗主都忍唔住割席

摺疊杯餵完狗即倒殘水入咖啡杯

事發於本周一（1日），有網民在Facebook群組「家@油塘」發帖踢爆，指一對年長男女帶同寵物手推車進入油塘大型商場內一間連鎖Cafe，二人坐低後將狗車停泊在餐桌旁邊。樓主目擊該對男女原本有用自備摺疊杯餵狗飲水，但餵完之後竟然將狗飲剩嘅水直接倒落餐廳提供嘅咖啡杯內，樓主怒斥：「妳要飲狗口水都唔好要其他人陪妳！」樓主更指出，雖然商場本身允許寵物進入並提供寵物車，但帶狗進入餐廳範圍其實「還未實行」，直指該對男女將狗車放喺餐桌旁已經係「踩界」行為。另外樓主亦澄清，相片中坐喺旁邊嘅女童並非與該對夫婦同行。

事件曝光後狗主群起割席鬧爆無公德心

事件曝光後，大批網民替其他食客不值，紛紛湧入留言區鬧爆涉事夫婦極度自私。有網民即刻引用食環署最新指引，強調「狗隻絕對禁止使用餐廳可重用餐具，以保障公共衞生」。最令人意外嘅係，連一眾愛狗人士都齊聲割席，直言「我養狗都接受唔到」、「真係丁點公德心都冇」、「點解唔買水樽俾狗飲水？」有狗主更表示自己帶狗外出一定會自備不鏽鋼兜 or 即棄餐具，絕對唔會用餐廳餐具餵狗，批評涉事夫婦令所有負責任嘅狗主蒙羞。

食客留陰影恐累全港毛孩被歧視

事件持續發酵，不少網民直言對該間Cafe留下極大衛生陰影，部分人更揚言「我一定唔會再去呢間店食嘢」、「所以我唔會去狗可入之餐廳」。雖然有人嘗試以「餐具最終都會清洗」作辯護，但隨即被大量網民反駁，認為將狗口水倒入人類共用餐具，本質上已超越基本衛生底線。更多網民擔憂嘅係，呢類自私行為會連累其他毛孩被歧視，令社會更難接納寵物進入公共空間，慨嘆「動物是好可愛，但主人處理不好，累到動物都給人歧視」，呼籲所有狗主做好本份，以免寵物友善政策因少數害群之馬而開倒車。