西九ATM怪漢突埋身稱「張卡係我」 港男1招即場拆穿

怪漢突然埋身聲稱提款卡屬於自己

事主於28日在西九龍一部ATM提款，當櫃員機正準備吐鈔之際，一名男子突然走近並開口稱「張卡係我」。事主第一時間以身體擋住插卡口及出鈔位置，防止對方有機可乘，隨即反駁：「唔好玩喇，張卡我㗎。張卡你嘅話，我點會拎到錢呀！」事主更以眼神厲住該名男子，對方見計謀被識破，竟做出摷褲袋動作，然後講咗句「喺度」企圖扮成自己搵緊嘢，試圖化解尷尬局面。事主隨即取回現金安全離開，而怪漢則繼續留在原地，疑似等待下一個目標。

事件曝光後網民群起拆解騙徒套路

事件曝光後，大批網民替事主不值，紛紛分析該名怪漢背後意圖。有精明網民點出，騙徒根本唔係想要張卡，而係趁事主慌亂之際搶走櫃員機吐出嘅現金。有人剖析騙徒心理：「佢可能等你慌忙中掛住攞卡走、會唔記得拎錢」，亦有人和應指呢套手法屢見不鮮，「趁你唔注意會俾人一下拎走晒啲錢即走」，提醒大家撳錢時若發現後面有人企得太埋，必須加倍警惕。

網民獻計應對招數笑翻全場

面對呢類白撞「撳機黨」，網民紛協助獻出實用兼爆笑嘅應對策略。有人建議「乜嘢都唔使同佢講，大叫『打劫』！」，亦有人教路「大嗌有cam影住，你埋嚟做乜？」，認為引起途人注意就能令騙徒知難而退。更有網民從源頭解決問題，直言「唔用卡提款好耐」，改用手機無卡提款功能就能避開呢類風險，反問「今時今日仲有人用提款卡去提款機撳錢」，令一眾網民反思日常提款習慣。事主事後亦在帖文中提醒大眾，不論對方係真唔見卡定假扮，撳機時都要十分警剔，小心保管財物。