夫妻肺片｜陳煒自爆被嫩男力追！拍劇遭小鮮肉瘋狂言語挑逗？曾遭前夫冷淡對待受3大傷害

陳煒節目驚爆曾遇小鮮肉追求

在即將首播的清談節目《夫妻肺片》中，陳煒分享了一段鮮為人知的經歷。她透露在一次拍劇期間，被一位同劇男演員追求，而對方的年紀比她「年輕一大截」。陳煒形容該名「小鮮肉」攻勢猛烈，尤其在言語上非常直接，她直言：「語言上好多撩你嘅說話。」同時她亦坦承當時對巨大的年齡差距有所顧慮，表示：「我年長過佢好多。」

網民好奇男主角身份 大讚煒哥有魅力

陳煒的分享引發網民熱議，不少人對這位「小鮮肉」的身份感到非常好奇，同時大讚陳煒魅力非凡。「煒哥真係愈來愈有女人味，難怪小鮮肉都心動！」「結咗婚都仲有市場，證明煒哥魅力沒法擋！」「好好奇係邊個男藝人咁識貨！」「想知煒哥點樣應對，明晚實追睇《夫妻肺片》！」「其實年齡唔係問題，最緊要係真心！」

陳煒曾遭前夫冷淡對待受3大傷害 離婚唔要豪宅

陳煒2008年與細三年、從事綠色能源產業生意的台灣富商顏志行結婚而宣布息影，先後移居台灣、北京同泰國合共四年。2012年突然一句「戲癮起」簽約TVB復出，密密接劇。少奶奶忽然進取，原來是因為守不住婚姻。當時她向前夫提出搬回香港照顧患病父母，夫妻開始分隔兩地生活，多次傳出婚姻出現危機，不過她一直不認婚姻出現問題，2016年還邀請「老公」亮相自己的TVB飲食節目《煒哥的味道》，甜蜜地介紹他：「呢個係我老闆，亦都係我老公顏先生。」人前人後表現恩愛。

直言前夫關係冷淡 「佢好少掂我」對方主動提出離婚

不過煒哥前夫顏志行被踢爆與台灣歌手鄭雙雙關係密切，更一起前往峇里參加朋友婚禮，她才迫於無奈公開承認與顏志行在2012年已經簽字離婚。她曾接受訪問時自爆當年息影後隨前夫到泰國定居，但老公終日埋頭苦幹工作，對她有所忽略，親熱活動未如理想，更直言「佢好少掂我」。另外她曾於電台訪問中大爆前夫對她冷淡：「以前同前夫就係佢不斷外出工作開會，返到屋企只會話好攰情願瞓覺，即使我想了解佢，佢都唔想傾，我唔會勉強人，但久而久之，就變成補救唔到嘅關係。」而且前夫只顧打理生意，她在外地沒有親人、朋友，終日在屋企煮飯同打理家頭細務，猶如阿四：「前夫太專注事業！時間耐咗，我就好似屋企電器咁放埋一邊，咁做朋友好過做夫妻！大家好似家人咁相處，都唔係壞事！」

淚眼指隱瞞離婚有原因 失婚後要睇精神科

2019年陳煒在TVB節目《如果這樣生活》中哽咽說表示一直說謊隱瞞，是因為覺得有機會挽救婚姻﹐強調離婚是被逼，她雙眼通紅哽咽說：「傳媒一直好關心我嘅感情生活，我一直無交代，我之前無講，因為想保持呢段關係，我覺得有挽救嘅機會，所以唔想講。坦白講，我唔想分開，呢個唔係我嘅意願，離婚其實係佢提出，佢覺得工作上，可能有啲事情佢需要處理。佢覺得佢要花好多時間，都覺得佢有虧欠我。既然佢無能力付出佢嘅感情，要處理好多事情嘅時候，就覺得不如雙方中斷呢段關係啦 ﹗」她坦言前夫提出離婚時自己都好難接受，需要找精神科醫生協助。

陳煒靠自己拒收豪宅

雖然前夫是富商，但離婚後她沒依賴男方，有傳前夫曾想盡最後一點責任，想於香港買樓給她，可是她拒絕，認為離婚就應該各有各生活，靠自己賺錢。她指自細都好獨立，讀中一時已經開始煮飯給屋企人食，而離婚後沒有人照顧自己，回歸單身更要愛錫自己多點，屋企要修理任何嘢、換燈膽都要自己。慶幸後來得到家人和朋友開解，加上寄情工作，她才能走出陰霾： 「唔靠自己靠得邊個？因為自己性格同環境因素令到自己咁獨立，同埋一路都靠自己。最緊要自己要focus落一個目標度，盡力做好自己。壓力係會有，但盡量去抒解自己，咁好彩我自己遇到呢份工作自己係好鍾意。工作上壓力唔大，但自己俾自己壓力係大，因為我每個角色都想用心去做好佢，呢啲壓力相對都係一個動力。但抒解壓力嘅方法都係自己要調適，搵朋友去傾。」