網民公審公屋戶請外傭促交還單位　結果即刻「炒車」被圍剿

樓主連環質疑公屋戶請工人屬屈蛇兼富戶

事件發生喺27日，有網民喺公屋討論區發帖，劈頭就問「點解住公屋可以請姐姐」，繼而連珠炮發質疑：有錢請外傭點解唔租私樓？姐姐冇加名入戶籍係咪即係「屈蛇」？有房間畀工人瞓係咪代表「寬敞戶」？樓主更提出極具爭議嘅觀點，認為請得起外傭嘅公屋戶應該將單位交還房署，用嗰筆錢去租私樓，又質疑房署對越來越多公屋戶請工人視而不見。成篇帖文語氣咄咄逼人，擺明車馬要公審呢班住公屋又請姐姐嘅街坊。

事件曝光後大批網民替基層居民不值群起圍剿樓主

帖文一出，唔單止冇人附和，反而惹嚟猛烈抨擊同恥笑。有熱心網民即刻拆解房署政策，指出公屋住戶只要向屋邨辦事處提交「HD1031C」海外家庭傭工暫准居住申請書，證明有照顧老幼需要並獲批，姐姐就可以合法暫住單位，完全唔存在屈蛇。至於「有位畀姐姐瞓」嘅問題，網民解釋好多工人只係瞓上下格床或者客廳間出嘅小空間，同房署定義嘅寬敞戶根本係兩碼子事。更有人反問：「請個姐姐$5,100，可以租咩私樓？」一句KO樓主嘅離地邏輯。

基層家庭紛紛現身說法揭露請工人背後辛酸

最令人意想不到嘅係，帖文反而引出大批基層居民分享真實處境。有雙職父母大呻：「有小朋友，唔請工人就要自己全職湊，少咗收入連公屋都住唔起，要拎綜援。」有人為獨居長者發聲：「就係窮出去返工先要請工人照顧屋企老人家，有錢就自己照顧啦。」更有單親家庭網民激動留言：「我係單親家庭，我唔請工人，你幫我睇住我兩個仔呀？」網民語重心長指出，現時家庭月入$15,000已符合聘請外傭基本要求，公屋家庭請姐姐往往係解決雙職父母照顧子女或長者缺乏照料嘅剛性需求，一句「窮先要返工，返工先要請姐姐」道盡基層嘅無奈，樓主嘅公審最終變成一場自打嘴巴嘅鬧劇。