元朗「伸手黨」幼稚園外日問4次纏擾一周港媽拍片追問結局大快人心

May 17 2026

一名黑衣男子連日在元朗幼稚園外以「唔鹹唔淡」廣東話向家長索取金錢，聲稱要買奶粉，同一名港媽一星期內每日被問足4次，前後被纏擾超過28次. 港媽忍無難忍拍片質問，男子即刻以手遮臉急步逃走，事件結局令街坊拍手叫好。

港媽一星期被纏擾28次忍無可忍拍片追問

事主於14日在社交平台Threads上載短片踢爆事件，片中可見該名黑衣男子在幼稚園外徘徊，趁家長接送小朋友時逐一埋身搭訕。港媽大呻該男子日日在校門外「盤旋」，用生硬廣東話不斷問人「可唔可以俾錢佢買奶粉」，即使被拒絕亦照問不誤，「啱啱才問完都冇1分鐘，我送完小朋友返學行返出嚟又問」，情況猶如食藥般準時。港媽終於按捺不住上前質問「你日日係咁問人借錢，唔係咁好喎」，黑衣男即時下意識舉手遮臉，隨口答咗句便急步離開現場。除咗幼稚園外，街坊爆料該男子出沒範圍極廣，由大馬路恒生銀行附近、千色一帶、大棠道輕鐵站到惠康門口都有佢蹤影，甚至凌晨1點、凌晨4點都照樣開工問人攞錢，有街坊更被佢由幼稚園一路跟到惠康門口先肯罷休。

街坊群起公審爆料揭發各種離譜伸手故事

事件曝光後，大批街坊替事主不值，紛紛湧入留言區認人兼爆料。有人指「半個鐘前被佢問完」，亦有人話「琴晚都見到佢，好險」，顯示該男子幾乎全日無休止地四出搵獵物。網民更大爆各種離譜經歷——有人凌晨1點放狗被問「有冇100蚊」、有人凌晨4點等巴士返工被索取車費、甚至有人目擊佢上咗巴士問人攞車費，攞到錢即刻落返車，手法極其熟練。有網民特別提到一位正義大叔，「我見前面個叔叔係咁望住我哋揮手叫我哋唔好理佢」，成功令街坊避過一劫。另有睇馬經阿伯直接大聲喝退該男子，霸氣護街坊。不過亦有好心網民提醒大家「呢啲人精神多少有啲問題，唔好追住嚟影，萬一佢突然發癲打你，受傷嗰個只會係你」，呼籲街坊注意自身安全。