港女北上千元剝智慧齒 術後面腫一倍呼吸困難 結局意想不到

千元拔牙20分鐘搞掂 第三日起噩夢降臨

事主早前在社交平台發文大呻，指自己智慧齒生長位置極為刁鑽，曾經諮詢香港牙醫，對方坦言「無信心」處理，建議轉介菲臘牙科醫院；另一位口碑極好嘅知名牙醫則要排期數月。事主權衡價錢同時間成本後，參考網上評價加上朋友介紹，揀咗深圳春風路一間牙科診所。手術由一名王姓醫生操刀，連CT掃描、拔牙同藥費，總共只係花咗約984元人民幣（折合約1,060港元），全程僅用約20分鐘。事主當初仲覺得過程「無想像中痛」，點知噩夢先正式開始——術後第三日，右邊面同口腔內部腫脹加倍，連口都張唔開，食止痛藥同消炎藥都無乜效果。去到第四日，傷口持續滲血之餘，仲散發出陣陣腐肉般嘅臭味，事主因為食唔到嘢，體重急跌1.9公斤。直到第五日覆診，先被確診為「下頜間隙感染」，需要每日到診所打兩次靜脈注射。

事件曝光後網民群起公審質疑事主一意孤行

事件曝光後，大批網民對事主嘅決定提出質疑，討論區隨即洗版。唔少人認為事主無視香港牙醫嘅專業判斷，為慳錢而罔顧安全，鬧爆佢「點解唔聽人講」，直指香港醫生已經明確表示難度高，有經驗有實力，但事主偏偏一意孤行走去搵平嘢. 有網民感嘆「香港貴但條命仲貴」，認為醫療安全絕對唔可以用價錢去衡量。不過亦有同情事主嘅聲音，提醒面部嚴重腫脹有機會壓迫呼吸道，隨時有生命危險，支持佢趕返香港保命先。

呼吸困難緊急返港入院 事主坦言從此怕北上求醫

事主透露操刀嘅王醫生態度相當冷淡，佢曾經焦急追問幾時需要「開刀放膿」，但對方只係輕描淡寫回覆「腫起來皮膚就係咁嘅感覺」，又話「牙齒本身就非常難拔，有呢種反應好正常」，仲叫事主多請幾日假觀察。眼見病情持續惡化，事主最終因為感到呼吸困難，決定緊急趕返香港醫院急症室求助。返港後即刻獲安排住院檢查及照X光，事主大讚香港護理人員專業又溫柔，並坦言經歷今次慘痛教訓，「真係見過鬼都怕黑」，對北上求醫已經產生極大恐懼。