港鐵3女乘客公然偷電？職員廣東話勸止無反應 轉Channel講一句即刻縮！

港鐵旺角站上演偷電羅生門？3女自備拖板霸佔職員專用插座

事發喺5月3號，正值黃金周旅遊高峰期。據目擊者喺網上發布嘅相片所見，至少3名女乘客施施然坐喺旺角站月台嘅牆邊長凳，將自備嘅轉插器同充電線，直接插入牆上一個清楚標明「職員專用」嘅插座，為手機充電續命。佢哋更將多個背囊、手袋同購物袋放喺旁邊，佔用唔少公共空間。帖文事主睇唔過眼，怒斥：「帶埋拖板轉插偷電，下次可以喺度紮埋營」。未幾，一名港鐵職員上前處理，先用廣東話禮貌勸止，點知嗰3名女乘客完全無反應，繼續低頭玩手機。職員見狀，即刻「轉Channel」改用普通話再講一次，佢哋先如夢初醒，即時拔走插頭！

網民群起洗版怒插離譜行徑！大讚職員一招KO超高EQ

事件曝光後，即刻引發網民洗版式討論！大批網民鬧爆涉事乘客行為「無恥」、「不知所謂」，狠批：「大大隻中文字『職員專用』都當睇唔到？」、「影衰晒！」。唔少人更大讚港鐵職員機智過人，「做得好」、「一招KO，高EQ表現」。不過，亦有少數網民認為應該體諒，「可能佢哋真係唔識聽廣東話嘅，勸咗改善咗就算啦」。但呢個講法隨即被反駁，認為就算聽唔明，都應該睇得明「職員專用」四個大字。

隨時瀨嘢！大律師警告擅自充電或觸犯盜竊罪最高可囚5年

大家「食花生」之餘，都要知道呢種行為隨時會「瀨嘢」！有執業大律師曾指出，任何人士擅自使用車站、商場或政府部門嘅插座充電，都有機會觸犯香港法例第210章《盜竊罪條例》中嘅「竊取電力」罪。根據法例，任何人不誠實地使用電力，即屬犯罪，一經循公訴程序定罪，最高刑罰竟然係監禁5年！為咗幫手機充少少電而惹上官非，絕對係得不償失，大家切勿以身試法！