華女設「殺豬盤」呃13人近$2000萬！FB交友轉WhatsApp私聊 驚人結局曝光

FB交友轉WhatsApp私聊呃走846萬港元

事件中，有受害人大呻，佢喺2023年3月透過Facebook認識一名自稱「Lily List」嘅女子，好快就俾對方嘅甜言蜜語攻陷，轉到WhatsApp繼續私聊。騙徒見時機成熟，就引導佢到一個名為「Spread Ex Ltd」嘅虛假投資平台，聲稱回報穩定兼風險極低。受害人信以為真，喺短短一年內先後13次匯款，總金額高達108萬美元（約846.2萬港元）！初期網站仲會顯示戶口資產持續增長，營造賺大錢假象，但當受害人想提現時，先發現血本無歸，平台更人間蒸發！

開97間空殼公司洗黑錢警方上門搜出驚人證據

警方接報後深入追查，發現部分騙款流入一個與37歲華裔女子Tiffany Yang關聯嘅銀行戶口，更驚人嘅係，登記地址竟然被用嚟註冊多達97間水療、美甲、酒吧等空殼公司，明顯係為咗掩飾龐大嘅非法資金流向！執法人員鎖定疑犯住址後，於2025年10月2日上門搜查，當場將其拘捕。行動中，警方搜出大量銀行轉賬記錄、支票、提款卡、多本中美護照、偽造簽證，甚至仲有一柄未上膛嘅點45口徑手槍，證據顯示佢長期從事跨境詐騙活動。

呃近2000萬僅囚120日最終下場曝光

案件日前審結，最終紐約皇后區最高法院法官判處Tiffany Yang入獄120天。雖然佢需要向13名受害人賠償約132.8萬美元（約1,041萬港元）、充公約117.2萬美元（約918.1萬港元）現金及名牌手袋、名錶等奢侈品，總額近1,950萬港元，但僅僅120日嘅監禁，與其騙取嘅巨額金錢相比，實在令人嘩然。雖然檢察官強調已為受害人討回大部分損失，但呢個結局亦引發極大爭議。