¥100萬懸賞搵合成肉？內地網紅實測¥78烤肉放題 踢爆安格斯牛一捏即碎結局竟係…

人均¥78食安格斯牛？博主實測6款肉類4款出事

事緣抖音博主「真探朱圓章」收到粉絲報料，決定親身去呢間「安壯壯無限自助烤肉」一探究竟。佢喺店內隨機揀咗6款熱門肉類，包括4款牛、1款豬同1款羊肉進行測試。點知連店員都親口承認，有幾款肉「算不上原切」。博主實測後更發現，當中4款肉都極有問題！其中一款標明係「安格斯黑椒肥牛」，烤完唔單止唔縮水，食落仲完全無牛肉味，懷疑係加咗保水劑；而另一款「安格斯牛肉粒」就更誇張，博主用手輕輕一捏就爛開，手指上仲殘留水份同白色粉狀物，烤熟後表面更呈現蜂窩狀，明顯係用牛碎肉壓製而成嘅「合成肉」！另外，羊肉卷亦被發現表面有大量窿窿，膻味極重，明顯以次充好！

事件曝光後博主當面對質店家竟以呢個理由推搪

事件曝光後，大批網民替事主不值，紛紛鬧爆店家欺騙消費者！博主眼見證據確鑿，決定即場兌現店家「發現合成肉獎100萬」嘅承諾，並表明會將獎金全數捐俾慈善基金. 誰知店員見狀即刻「耍太極」，一時話「店長唔喺度」，一時又諸多推搪，總之就係唔肯找數。雙方溝通無果，博主決定採取更進一步行動，為一眾被蒙在鼓裡嘅食客討回公道。

百萬懸賞得個吉？博主即場報警處理結局大快人心

面對店家嘅賴皮行為，博主忍無可忍，決定唔再同佢哋糾纏，即場打電話向市場監管部門舉報，指控餐廳涉嫌虛假宣傳同埋以次充好。當局接報後已即時登記備案，並表示會依法跟進查處。雖然100萬獎金最終「得個吉」，但博主成功踢爆奸商嘅手法，總算為消費者出返啖氣。據了解，呢個烤肉品牌喺全國有16間分店，今次事件勢必對其商譽造成沉重打擊。