二手傢俬Group驚現「投資專家」？港女信錯一人 過數60次後結局超崩潰

港女誤信傢俬群組專家60次過數慘失520萬

事主憶述，起初只係喺一個二手傢俬群組認識咗一位「專家」，對方不斷吹噓自己投資好有心得，仲熱情邀請事主一齊發達。喺對方嘅花言丘語下，事主被氹到一個虛假投資網站，開始投資泰達幣（USDT）。騙徒其後不斷以唔同藉口，指示事主將款項同加密貨幣轉入指定戶口，前後足足轉賬超過60次！事主初時仲以為自己財源滾滾，點知到想提現一刻，對方即刻玩失蹤兼拒絕，事主先如夢初醒，但已經為時已晚，總共慘失高達520萬港元！

事件曝光後網民洗版鬧爆騙徒手法太高章

事件曝光後，大批網民替事主不值，紛紛鬧爆騙徒手法層出不窮兼「高章」，竟然連二手傢俬群組都變成行騙嘅地方！有網民就話「真係防不勝防，估唔到買賣二手嘢都可以出事」、「$520萬可以買到好多傢俬，真係慘」。事實上，類似騙案近期頻頻發生，警方指出單單過去一星期，就接獲近百宗網上投資騙案，除咗呢位事主，仲有61歲退休漢墮入「台灣寶貝」網戀投資陷阱失50萬、有女士玩AI量化交易被呃70萬，可見騙徒劇本愈嚟愈多，市民真係要打醒十二分精神！

警方提醒投資騙案近百宗市民應善用防騙視伏器

面對騙案數字急升，警方亦喺Facebook專頁「守網者」緊急呼籲，提醒市民網上投資危機四伏，喺網上見到任何「專家」或者「高回報」嘅投資機會，都應該先查證平台係咪信得過。警方強調，大家應該多啲關心身邊嘅親友，如果佢哋突然話有「必賺」嘅投資機會，一律要當作騙案看待。投資前除咗向官方機構查詢，亦可以即刻用「守網者」網站或者手機App嘅「防騙視伏器」，輸入可疑網址查證，避免成為下一個受害者！