馬鞍山$35兩餸飯中伏！事主打開飯盒後嬲到震 怒轟：以後唔會再幫襯！

事主$35兩餸飯中伏！怒呻得3隻雞翼加幾條菜

事主日前喺Facebook群組「馬鞍山之友」大呻，指自己喺港鐵烏溪沙站一間兩餸飯店，買咗個$35嘅兩餸飯，點知一打開個飯盒，當堂嚇一跳！相中可見，飯盒內餸菜份量極少，只得孤伶伶3隻滷水雞翼，配上幾件西蘭花同1條紅蘿蔔絲，而啲白飯睇落仲要又乾又硬。事主認為價錢同份量完全唔成正比，忍唔住怒轟「真係好離譜」，更嬲到表明「以後都唔會再幫襯！」。

帖文引發網民激辯！有人反寸事主太奄尖要求多

事件曝光後，帖文隨即喺Facebook群組洗版，引發網民兩極回應。有網民竟然反過嚟鬧爆事主，覺得佢要求太多，「而家物價成本全部都貴」、「30幾蚊仲想點？留喺屋企食公仔麵啦」，更有人揶揄佢係咪「想要11隻雞翼？」。不過，大批網民都力撐事主，認為以$35呢個價錢嚟講，份量的確「唔抵食」，更有熟客留言指間舖質素下降，「開頭好好㗎，而家又難食，份量又少，無幫親好耐」。

同區街坊報料！分享區內更高CP值兩餸飯選擇

正當大家圍爐公審之際，唔少同區街坊就化身「兩餸飯達人」，紛紛提供更抵食嘅選擇！有網民就熱心報料，建議事主可以轉場試下其他舖頭，例如「利安嗰間8，勁多餸，仲可以多飯添」，亦有人推薦「去新港城街巿買夠大份」。睇嚟馬鞍山區內仲有唔少臥虎藏龍嘅兩餸飯店，想食平靚正嘅朋友，下次可以參考下街坊推介，唔使再硬食「迷你飯」啦！