輕鐵一家四口逃票斷正！阿媽「1句神回應」惹公憤 網民錯重點反讚女職員？

一家四口輕鐵斷正阿媽驚天一句惹公憤

事發喺4月19日一個星期日，有目擊者喺輕鐵鍾屋村站月台，見到有至少3名港鐵職員，正向住一家四口，包括3男1女查票。原來呢家人貪方便無買飛，斷正後其中嘅女家長非但無半分愧疚，反而大條道理向職員表示：「估唔到星期日都會查飛！」，似乎認為假日就係「免費乘車日」。呢句驚天言論令目擊者大感震驚，認為實在太離譜，於是將過程影低並放上網，希望大家評評理。

網民鬧爆上樑不正下樑歪教壞細路

事件曝光後，帖文喺各大社交群組被瘋傳洗版，大批網民替職員不值，並群起鬧爆該家庭嘅行為。唔少人直斥家長身教失敗，「上樑不正下樑歪，父母教壞下一代」、「黐線，逃票都可以咁理直氣氣壯」、「講到呢句！已經犯了很多次！」，認為佢哋喺仔女面前立下極壞榜樣。網民一面倒力撐港鐵職員「做得好」，認為必須嚴正執法，杜絕呢啲「無恥」嘅逃票行為。

事件意外歪樓網民錯重點大讚女職員仙氣靚樣

正當全城圍插逃票家庭之際，討論風向竟然出現180度大轉變！唔少眼利嘅網民將焦點「錯重點」放喺其中一位執法嘅女職員身上。雖然相片唔算高清，但仍無阻網民發現該女職員樣貌標緻，紛紛留言大讚佢係「美女」，令呢場公審大會意外變成一場「選美」。不過，無論焦點如何轉移，大部分人都認同家長應以身作則，守法教導子女先係最重要嘅一課。