內地客嫌酒店Wi-Fi密碼「全英文」太複雜！怒呻：點解唔係88888888？網民睇完秒KO！

內地客怒轟酒店Wi-Fi密碼反人類

事緣該名內地住客近日入住連鎖品牌「麗楓酒店」，當佢攞到Wi-Fi密碼卡時，即時理智斷線！從佢上載到小紅書嘅相片可見，密碼正正就係酒店嘅英文名「LAVANDEH…」，全部都係大階英文字母。事主對此大感不滿，發文怒訴：「出差住過不少酒店，遇到最多的密碼就是88888888，其次是公司的一串數字電話號碼，這都算複雜了，你倒好，直接一串英文！」字裡行間充滿怨氣，認為酒店提供全英文密碼係極度不便嘅做法。

網民群起公審恥笑唔識用Caps Lock

帖文被轉載到香港連登討論區後，隨即引發網民群起公審，留言恥笑事主小題大做！大批網民鬧爆：「照住入都唔識？」、「全部大階仲想點，一啲大階、一啲細階、一啲數字、一啲符號畀你好冇？」整個討論區瞬間被洗版。更有醒目網民一語道破盲點，推測事主可能根本唔識用電腦鍵盤上嘅「Caps Lock（大寫鎖定鍵）」，以為要逐個字母撳實Shift掣再輸入，先會覺得麻煩，「個密碼係全大寫，條友唔識用caps lock，結果每輸入1個字就要撳1下shift」，神分析引嚟唔少人讚好。

事主疑不敵輿論壓力極速刪帖

呢場由Wi-Fi密碼引發嘅風波，喺網上持續發酵。可能係見劣評如潮，加上「唔識用Caps Lock」嘅推測實在太過深入民心，有網民發現，該名內地住客已經靜靜雞將小紅書上嘅投訴原文刪除，似乎想當無事發生過。雖然事主已「潛水」，但事件已成為網民茶餘飯後嘅熱話，唔少人仲笑言，今次真係學到嘢，原來識用Caps Lock都係一種生活技能！