港版馬爾代夫慘遭毒手！遊客湧浪茄灣爬樹打卡 驚見塌樹斷枝 目擊者勸阻後續更嬲

女遊客為打卡奇招盡出 幼樹慘遭毒手劇烈晃動

根據網民喺4月18日上載到社交平台Threads嘅多段影片，事發地點正正係西貢東郊野公園嘅浪茄灣沙灘。片中可見，大批遊客包圍住沙灘上嘅幾棵幼樹，當中多名女遊客為咗影靚相，完全無視樹木嘅承受能力。有人直接用雙手吊喺脆弱嘅樹丫上，身體前後擺動當”引體上升”玩，導致整棵幼樹被瘋狂搖晃；更有身穿短裙嘅女士，懶理樹身圍住嘅危險警告膠帶，大動作踩上樹幹借力向上爬，行徑極之誇張，令人咋舌。

影片瘋傳網民群起公審 怒斥自私行為破壞環境

事件影片曝光後，即時喺各大社交平台被瘋傳洗版，大批網民睇到眼火爆，群起公審呢啲遊客嘅自私行為！唔少人鬧爆佢哋係”觀光災害”，直斥”棵樹好慘……”、”好肉酸”。有網民留言怒斥：”這些為了影靚相而不惜攀爬小樹的人真令人咋舌，真可憐那飽受摧殘的小樹！”認為呢種為咗打卡而破壞環境嘅行為，實在不能接受。

目擊者出聲勸阻反遭無視 嘆遊客質素好差囉

最令人髮指嘅係，拍攝影片嘅目擊者當時曾嘗試出聲勸止，大叫”咩事呀！影相啫唔使咁呀！”，希望佢哋停止破壞行為。點知對方竟然”扮聽唔到”，完全無理會，繼續我行我素。最終，沙灘上嘅樹木慘遭毒手，有樹枝被折斷，甚至有樹木直接倒塌。眼見勸阻無效，樹木更受到實質傷害，令該目擊者極度憤怒，忍唔住大呻一句”好差囉”，對遊客嘅質素大感失望。