婆婆商場扶手梯跌倒無人理！殯儀師怒斥港人冷漠　網民揭2大主因

婆婆扶手梯跌倒眾人冷眼旁觀　殯儀師怒斥港人冷漠

該名殯儀業港男在threads帳號「bonleung_」發文，直言「『香港』呢個地方令我感覺愈嚟愈陌生」。事發在周三（15日）早上，樓主完成出殯儀式後在商場用餐，突然聽到扶手電梯傳來呼喊聲，發現有婆婆不慎跌倒。令人震驚的是，現場完全沒有人上前幫忙或按緊急停止按鈕，眾人任由婆婆「打斜瞓住喺個電梯仲一路上緊去」。樓主上前時發現倒地婆婆即將到達電梯頂端，他即時按下緊急暫停掣，並和另一位男途人合力將婆婆移至平地。更離譜的是，其間有不少人只顧「八卦」兼拍片，連保安員都未有做好人流控制，需要樓主出聲示意才懂得按停另一邊扶手電梯。

網民群起公審港人冷漠　大呻親身經歷無人理

事件曝光後，大批網民替事主不值，紛紛分享類似遭遇。有網民透露「我老豆上年喺X展嘅商場暈咗，電話俾人偷咗，人係自己醒返自己走」、「之前我阿媽喺廁所跣低都無人理」、「我明呀，有次落雨我喺條斜路跣親都無人理過我」。不少人感慨港人近年漸變冷漠，同時感激樓主伸出援手，「好彩阿婆遇到你」、「多謝你嘅好心同付出，香港就係需要大家互相幫助」。

網民揭港人冷漠2大主因　太多碰瓷黨人人自危

不過有留言歸納港人變得冷漠的2大主因，首先是擔心遇到碰瓷黨，「個個驚一出手就中伏」、「太多碰瓷黨，搞到香港人個個有戒心」。其次是現代人過於專注使用電子產品，「我都覺得絕大部份人無以前咁高警覺性，唔係唔熱心，而係對周遭事物嘅專注力差咗好多，大家都活喺手機世界上面、戴降噪耳機，所以會遲一步理解發生咩事」。樓主事後表示「好嬲」，指婆婆年紀老邁「跌一跌好大鑊」，感慨港人從前遇事不會如此冷漠，但慶幸救護車迅速到場，文末祝願婆婆身體健康。