傳TVB強收藝人社交帳號 郭柏妍游嘉欣不入魔音原因曝光 官方發聲明澄清

郭柏妍游嘉欣《魔音女團》出局真相曝光

TVB最新綜藝選秀節目《魔音女團》成為推行「新規例」嘅首個節目，入圍嘅16位女藝人全部都要交出社交平台帳號。本來被視為熱門嘅郭柏妍同游嘉欣，外界一致睇好佢哋能夠藉此機會組團出道，點知結果一出令人嘖嘖稱奇，兩位竟然雙雙大熱倒灶被foul出局。知情者爆料指出真正主因係郭柏妍與游嘉欣一齊「抗旨」，拒絕交出社交帳號密碼，28歲嘅郭柏妍貴為2020年港姐季軍兼「A0女神」，IG粉絲有25.8萬，近年憑大熱劇《下流上車族》人氣急升，廣告代言接踵而來，保健產品、醫美療程、精品首飾等大品牌都曾搵上門。另一位26歲嘅游嘉欣憑着鄰家女孩清新形象，吸納大批年輕粉絲，IG粉絲有14.4萬。兩人都知道自己擁有唔少人氣，所以敢於企硬對抗公司條款。

戴祖儀成唯一生還者 劇集綜藝雙線爆發

喺4大「反抗軍」當中，31歲嘅戴祖儀雖然同樣對公司新政策反應極大，但佢竟然成為唯一「生還者」，最近仍然備受力捧！被稱為「多棲藝人」嘅戴祖儀，除咗參演熱播劇《正義女神》，最近更有機會參與旅遊節目《他們的澳洲駕期》，劇集綜藝雙線齊開，資源可謂逆市爆發。戴祖儀嘅Instagram坐擁29萬粉絲，由於粉絲眾多，故佢不時獲品牌邀請合作，亦經常孖住不同YouTuber合作拍鬼馬片段，仲有相當多嘅收看數次。不過點解佢可以喺「抗旨」同時仍然獲得公司力捧？有業內人士猜測可能係因為佢嘅後台夠硬，又或者係公司需要佢作為談判籌碼，總之佢嘅處境明顯比其他「反抗軍」優勝。

視帝張振朗陷僵局內地商演被叫停

最慘嘅要數38歲視帝張振朗，雖然最近喺公開活動中總係掛住招牌笑容，又活躍於社交平台，不時與女友楊偲泳「放閃」互動，更分享操肌成果。不過，據報張振朗認為社交平台係自己與粉絲直接溝通嘅橋樑，亦係多年來用心經營嘅私產，因此他擔心日後發文要經過審批，甚至同女友嘅互動都要被監控。

張振朗嘅IG粉絲高達37萬，並且喺內地人氣持續攀升，社交平台嘅商業價值極高。縱然佢最近仍然有機會亮相大型活動，但據知因為佢一直未首肯，故手頭上嘅幾個內地商演洽談已被暫時擱置。

TVB辣招背後藏多重商業考量

TVB今次嘅「辣招」背後其實藏住多重商業考量，更係一場難以避免嘅風險管理，並非單純嘅管制藝人措施。據悉，除咗配合TVB新成立嘅「藝人創作者網絡」（ACN），仲因為近年社交媒體「手滑」事件屢見不鮮，不少藝人因一時疏忽，點讚咗爭議性帖文、發布咗敏感言論，甚至洩露劇集造型，最終釀成公關危機，輕則刪帖道歉，重則影響內地市場。另外，完約後帳號歸公司管理一年嘅條款，主要係防止藝人帶走由公司資源建立嘅成果。

網民批TVB霸王條款太離譜

網民紛紛批評TVB嘅做法太過霸道。有網友批評：「咁自己D dm private msg咪被公司睇曬」，另有網友猜測：「tvb怕有第二個yumi不停大話冚大話」，認為公司係因為之前有藝人出事而矯枉過正。仲有網友指出：「未紅易搞好多，唔係個個入行前有社交帳號」，認為對於新人嚟講可能冇咁大影響，但對於已經有一定知名度嘅藝人就好不公平。最尖銳嘅評論係：「呢個年代做KOL易咁多，TVB擺明係唔想比佢哋留後路」。

官方發聲明澄清

對於以上嘅傳聞，TVB今日下午發聲明澄清事件：

就近日個別媒體有關電視廣播有限公司（下稱「本公司」）藝員社交平台合作安排的報道，本公司現作出澄清。 本公司一向尊重旗下藝員的個人私隱、合法權益及專業發展需要，並一直按照現行法律法規及既定內部程序，處理與藝員合作相關的行政及營運安排。 有關報道將本公司與藝員之間就社交平台合作及相關安排，描述為本公司強制所有藝人交出個人社交平台帳號，以作中央管轄，有關說法並不準確，亦未能反映實際情況。 公司與藝員之間就社交平台事宜的溝通，主要涉及節目宣傳、內容協作、廣告合作及相關營運安排，並一直以合法合規及互相尊重為前提。 本公司對任何失實或足以引起公眾誤解的報道表示關注，並保留一切權利。 電視廣播有限公司助理總經理（藝員管理及發展）樂易玲表示：「公司與藝員之間的溝通，主要是就社交媒體合作方式進行工作層面的交流。我們希望就外界因個別報道而產生的誤解作出澄清。」

電視廣播有限公司