首屆「嘉咸節」登場 必換限定紀念品＋免費工作坊體驗 + 新壁畫打卡！
活動１：跨代共創「嘉咸手信」 傳統名物變身型格手信
今次「嘉咸節」嘅一大亮點，就係「嘉咸手信」升級包裝企劃。VTC青年學院設計及印刷媒體學生，同嘉咸市集及周邊8間老字號商戶合作，包括大家熟悉嘅蘭芳園、公利真料竹蔗水、九龍醬園，以及排檔和昌號雜貨店、順記懷舊食品、生記海味雜貨、珊珊香料店同文記生果，一齊跨代共創。學生們將檔主嘅品牌故事融入設計，為佢哋出售嘅貨品重新設計包裝，唔單止外觀「IG-able」，亦兼顧實用性，務求令大家可以輕鬆將嘉咸市集嘅地道風味帶到更多、更遠嘅地方，成為富有本地特色嘅「嘉咸手信」。
VTC 青年學院學生亦為部份商販設計全新形象並拍攝專業照片，成為「嘉咸節」活動生招牌，海報同人形紙牌都放置喺市集周邊，打造型格市集，塑造正面繽紛嘅節慶形象。
期間限定Pop–Up「嘉咸辦館」
「嘉咸辦館」展示VTC青年學院學生今次為「嘉咸節」創作嘅作品，包括「嘉咸手信」、宣傳海報、主題紀念品同埋畫作。市集附近嘅休憩範圍亦設置咗由學生製作嘅立體動物雕塑，將公共藝術融入社區。
活動日期：即日至4月14日（星期二）
地點：中環嘉咸街23號H18B零售空間地下低層1號舖 （入口於卑利街）
開放時間：早上10:00至下午5:30
活動２：免費導賞團及工作坊 深度體驗市集「鮮」「活」
想更深入了解嘉咸街市集同商販嘅故事？「嘉咸節」期間會有多場街市導賞團俾市民免費報名參與， VTC青年學院學生會聯同昔日嘉咸市集嘅排檔商販一齊擔任導賞員，帶參加者走訪嘉咸市集同中環街市，細說社區百年變遷，亦會分享跨代合力創作「嘉咸手信」嘅過程同包裝設計理念。導賞團將於喺4月4、5、11、12及18日舉行，想參加就要留意「同心網絡」社交媒體平台嘅報名詳情喇！
另外，活動期間嘅週末亦設有一系列市集主題工作坊，嚟緊有玻璃樽彩繪同埋ViuTV節目主持Mable Ho親身示範健康美食烹飪。
| 工作坊 | 日期 | 時間 | 導師 |
| 環保玻璃樽彩繪 | 4月4日（六） | 11:00–12:30 /
14:00–15:30 / 15:35–17:15 |
同心網絡 |
| 健康美食烹飪示範 | 4月11日（六） | 14:00–15:30 /
15:45–17:15 |
Mable Ho
（ViuTV烹飪節目主持） |
有興趣嘅朋友，可以到「同心網絡」社交媒體平台報名，活動免費參加，名額有限，先到先得！
活動３：著數巡禮！消費換領限量紀念品及Chocolate Rain精品
「嘉咸節」仲有豐富嘅消費獎賞！活動期間，喺嘉咸市集同周邊約100間參與商戶單次消費滿港幣30元，即可獲蓋章一個，集齊6個印章，就可以到「嘉咸辦館」Pop-Up隨機換領限量版紀念品乙份！紀念品由VTC青年學院學生同本地設計師操刀，包括檯墊、圍裙、環保袋、磁石貼等，總數超過5,000份，換完即止。
另外，市建局聯同本地創作品牌Chocolate Rain創辦人麥雅端（Prudence Mak），推出「媽姐帶你遊中環」造型擺設換領活動。即日起至5月31日，喺中環街市、H18 CONET等指定商戶消費滿港幣150元，即可換領別注版Fatima媽姐IP擺設，粉絲們絕對不容錯過！
所有禮品及紀念品數量有限，先到先得，換完即止。
同場加映1：《新鮮日常 漫活香港》展覽及Pop-up Store
嘉咸市集隔離、新落成嘅嘉咸館，現正舉行《新鮮日常 漫活香港》大型展覽。展覽由香港藝術中心（動漫基地）主辦，參展漫畫家以嘉咸市集同周邊社區嘅故事為靈感，創作全新短篇故事，透過漫畫、插畫、大型雕塑及充氣裝置等多元形式，進駐嘉咸社區。
展覽詳情
日期：2026 年 4 月 2 日 – 5 月 5 日
時間：上午10:00–下午7:00
地點：中環卑利街 23 號嘉咸館 B/F層活動廳
Pop-up Store詳情
日期：2026 年 4 月 2 日 – 5 月 31 日
時間：上午10:00–下午7:00
Pop-up Store地點：中環結志街23號 零售空間 1樓12號舖
同場加映2：新打卡聖地：「中環之森」主題壁畫
行完展覽，記得去埋離嘉咸館1分鐘腳程嘅華安里休憩處打埋卡先至走！市建局搵嚟意大利街頭藝術家喺休憩處旁邊嘅大廈外牆畫咗幅超靚嘅「中環之森」主題新壁畫。呢幅壁畫畫咗窗內外嘅花草世界，充滿生命力，完美融入周邊環境！而休憩處入面就有由本地藝街家以「石屎生林」為靈感，喺公園不同角落畫上香港本地物種及中環建築細節嘅壁畫，等待大家細心發掘。依家成個公園煥然一新，除咗打卡，喺呢度坐吓、休息吓，都非常好Feel！
有關嘉咸節
市建局自啟動卑利街／嘉咸街重建項目以嚟，曾為毗連項目嘅嘉咸街市集同周邊地區舉辦 6 次推廣活動，主要係想帶動人流，為商販帶來更多生意，同時吸引更多市民認識同感受嘉咸市集嘅魅力。
今次係市建局第一次用「嘉咸節」嘅名義舉辦推廣活動，實現兩大突破。第一，活動有約 100 個商販參與支持，係歷年推廣活動之中參與商戶最多嘅一次；第二，商販唔再只係單純參與活動，而係由構思到執行都一齊落手落腳，由「參與者」變成「共創者」，體現市建局喺舊區推動「社區營造」嘅「聚、創、合、傳」（4C）策略——先凝聚商販同持分者對未來嘅共識，再鼓勵大家一齊運用創意、合作同承傳，逐步引導嘉咸街走向長遠、自主更新，令市集文化同地區特色可以繼續留低、一代代咁傳落去。
卑利街／嘉咸街重建項目嘅三個地盤當中，有兩個已經先後落成，改善咗社區環境，最後一個地盤亦將於今年內竣工。市建局會結合「改善已建設環境」、「連結社區持分者」同「刺激地區經濟」呢三項元素，發揮協同力量同效益，做到加強地區特色、帶動人流、提振經濟嘅目標，推動地區自主而持續嘅發展。
(Presented by 市區重建局)
