澳門好去處｜2026澳門國際美食之都嘉年華攻略！100個環球攤位/新口岸食住玩
焦點盛事：2026澳門國際美食之都嘉年華必玩攻略
一場嚟到澳門，梗係要直奔美食主題啦！作為聯合國教科文組織認可嘅「創意城市美食之都」，澳門今年再次舉辦盛大嘅美食嘉年華，由 3 月 20 日至 3 月 29 日（共 10 天），分為主會場（漁人碼頭羅馬廣場及勵駿大道）同分會場（新口岸廣州街及上海街步行區一帶），點樣玩得最精明？即睇以下 5 大攻略亮點：
1. 舌尖環遊世界：國際美食大道 100個攤位大晒冷
平時嘅美食節可能主打本地小食，但今次嘉年華係「國際級」！現場嘅「國際美食大道」設有 100 個美食展位（內地城市 28 個、海外城市 32 個、澳門 40 個）。你可以食到順德、成都嘅地道美食 ，又可以品嚐泰國綠咖喱、土耳其 Oruk ，甚至係沙特阿拉伯嘅秋葵燉菜同厄瓜多爾嘅加勒比風味蝦 ！留喺一個地方就可以畀條脷環遊世界，感受全球「美食之都」嘅魅力 ！
- 時間： 周一至周五 17:00 – 22:00；周六及周日 12:00 – 22:00
- 地點：（主會場）澳門漁人碼頭羅馬廣場及勵駿大道
2. 微醺之夜：全新「環球美酒廊」$98 聯動套票
嘉年華點少得美酒？強烈推介大家去今年全新登場嘅「環球美酒廊」，共有 30 個酒商參展 。必搶只需 $98 嘅「聯動套票」，內容超豐富：包 4 款品酒、1 次威士忌桶邊試飲、仲送 1 隻超靚嘅主題飲品杯，以及國際美食大道立減券 ！大會每 3 日就會更換一次飲品供應商，確保大家去幾次都有全新嘅微醺驚喜！
- 時間：周一至周五17:00 – 22:00、周六及周日12:00 – 22:00
- 地點：（主會場）澳門漁人碼頭傑克遜廣場
3. 雙會場出擊：首設新口岸「國際美食優品市場」
今年除咗有澳門漁人碼頭主會場，仲全新拓展咗「新口岸分會場」 ！特設「國際美食優品市場」，有 40 個參展商 。大家喺主會場食飽飽之後，記得去分會場掃貨，購買來自世界各地嘅特色美食產品同手信 。現場仲設有「咖啡」主題特裝展位，會有超精彩嘅「飲品匠藝展演」！
- 時間： 周一至周五 17:00 – 22:00；周六及周日 15:00 – 22:00
- 地點：（分會場）新口岸廣州街及上海街步行區一帶
4. 近距離偷師：名廚即席獻技兼免費試食
大會特意邀請咗多位來自世界各地 25 個「美食之都」嘅星級大廚，進行 53 場烹飪示範 ！最正嘅係現場特設試食環節，大家可以近距離偷師兼免費感受大廚手勢 。加上現場仲有麥麥人偶互動、高蹺、魔術等表演，氣氛超級熱鬧 。
- 時間：周一至周五17:00 – 21:45、周六及周日15:00 – 21:45
- 地點：（主會場）澳門漁人碼頭勵駿大道主舞台
（圖片來源：澳門旅遊局）
5. 瘋狂消費獎賞：贏遊戲幣、換咖啡、大抽獎！
喺嘉年華消費，記得保留單據！
- 贏遊戲幣： 單筆或累積消費滿 $30，即送遊戲幣 1 枚（滿 $60 送 2 枚，如此類推），可於主會場玩免費主題遊戲 。
- 換免費咖啡： 單筆或累積消費滿 $50，即可於分會場咖啡特裝展位免費換領咖啡乙杯 ！
- 大抽獎： 單筆或累積消費滿 $50，即可獲得 1 次抽獎機會（滿 $100 獲 2 次，如此類推）。
- 新口岸社區商戶聯動優惠：到詢問處免費領取活動主題優惠卡片一張，憑優惠卡於活動期間到指定新口岸商 戶合作商戶可享專屬優惠。數量有限，送完即止。
6. 歡樂滿 Fun：全天候精彩演出 ＋ 嘉年華專屬打卡點
食飽飲醉仲有豐富節目！主會場同分會場都特設咗多個嘉年華專屬嘅巨型打卡裝置同拱門，充滿異國風情同歡樂氣氛！大會仲精心安排咗一連串精彩演出，超可愛嘅澳門旅遊吉祥物「麥麥」人偶會不定時現身同大家互動合照，現場仲有高蹺表演、魔術雜技，氣氛 High 爆，絕對係一家大細放電同瘋狂影相嘅好時機！
- 地點： 主會場及分會場一帶
👉 官方網站查詢更多詳情
交通與泊車攻略：免費穿梭巴士直達 / 3 小時免費泊車
去嘉年華最怕同人迫車或者搵位泊車？大會非常貼心咁為大家安排妥當：
免費穿梭巴士路線 (每 30 – 60 分鐘一班) ：
- 路線一（過關即搭）：關閘口岸 ↔ 澳門漁人碼頭(周一至周五17:00至22:30及周六及日12:00至22:30；每30分鐘一班)
- 路線二（氹仔出發）： 氹仔中央公園 ↔ 澳門漁人碼頭（周一至周五17:00~22:30/周六及周日12:00~22:30；每30分鐘一班）
- 路線三（路氹區／酒店客最愛）： 綜合度假休閒企業（六大度假酒店） ↔ 新口岸上海街 (新東方置地酒店)（周一至周五17:00~22:30/周六及周日15:00~22:30；每60分鐘一班）
- 路線四（接駁雙會場）：澳門漁人碼頭 ↔ 新口岸上海街 (新東方置地酒店)（周一至周五17:00~22:30/周六及周日15:00~22:30；每10-15分鐘一班）
自駕人士必睇：3 小時免費泊車
自己揸車去都好方便！顧客可於澳門漁人碼頭全線停車場（包括 P1 會展停車場、P2 勵庭海景酒店露天停車場及 P3 勵庭海景酒店室內停車場）共享合計每日最多 3 小時免費泊車 ！
食在新口岸：網民熱捧區內覓食指南
新口岸及皇朝區嘅橫街窄巷其實隱藏咗唔少神級美食，編輯實測4間小紅書同Threads上多人討論嘅平民地道餐廳與特色餐廳，食過都真心推介！
1. 新洪記咖哩麵食專家：平民格局 摘星水準
跟住「地膽」一定食到最貼地嘅澳門風味，新洪記被老一代澳門人譽為「新口岸區咖哩粉麵天花板」！呢間老字號裝修格局平民，竟然食到星級酒店質素，原來佢哋主打嘅 Q 彈麵條同河粉，每朝早都會供應畀星級酒店，質素超值！編輯都跟住網民大推的招牌「咖哩牛筋腩河粉」，牛筋入口果然炆得超腍，咖哩香濃惹味，絕對係排隊都要食嘅名店！
- 地址： 澳門新口岸長崎街 55 號地下 B/C 舖
- 營業時間： 上午 9 時至下午 6 時 30 分
- 電話： +853 2875 1322
2. 民樂咖啡美食：人情味濃 性價比之選
經營超過三十年，一直用超實惠嘅價格回饋食客，被街坊口口相傳譽為「糧尾之選」。網民極力推薦招牌滑蛋牛肉飯、豆腐炆魚飯同埋滋補雞湯米線。最窩心嘅係，凡係堂食嘅客人，老闆都會熱情送上一份足料例湯，難怪好多搬走咗嘅熟客都會專程返去幫襯。
- 地址：澳門勞動節大馬路 49 號廣福安花園第三座地下
- 營業時間：上午 7 時至下午 6 時
- 電話：+853 2830 2996
圖片來源：澳門旅遊局
3. 公雞葡國餐廳 (Dom Galo)：價錢公道 味道正宗
嚟到澳門點可以唔食葡國菜？公雞葡國餐廳絕對係品嚐正宗澳門葡國菜嘅好去處。編輯實測份量夠晒大，而且價錢合理，性價比極高！必試足料嘅公雞葡國海鮮飯同埋紅酒燴牛尾。店內牆上仲畫滿各種葡式建築塗鴉，極具異國風情，打卡影相非常有趣。
- 地址：澳門宋玉生廣場倫斯泰特大馬路帝景苑地下AF-AG號舖
- 電話：+853 28751383
- 電郵： [email protected]
- 開放時間：上午12時至下午11時
4. 些美食 (SE cuisine)：微醺配佳餚 80年情懷
想搵間有情調嘅特色餐廳慶祝？推介呢間將藝術品與餐飲完美融合嘅輕復古西餐廳。餐廳主打以秘方傳承自 80 年歷史醬油品牌嘅自家製手工咖哩醬入饌，味道層次超豐富。環境高雅舒適，仲提供多款精心調製嘅雞尾酒，非常適合週末同另一半微醺歎世界。
- 地址：澳門孫逸仙大馬路漁人碼頭裏斯本館第3座1樓
- 電話：+853 28700163
- 電郵：[email protected]
- 開放時間：上午12時至下午12時
漫步新口岸：隨手影出歐洲大片/海濱漫步
新口岸區擁有全澳門最靚、最舒服嘅海濱長廊與特色地標，無論係情侶影相定係親子休閒，都絕對能滿足你嘅願望：
澳門漁人碼頭：澳門漁人碼頭：歐陸風打卡必去
經典必去嘅打卡聖地！漁人碼頭充滿古羅馬建築風格嘅競技場，以及極具歐陸色彩嘅風情街。編輯建議大家黃昏時分過嚟，當夕陽光線灑落喺羅馬石柱上，分分鐘影出震撼嘅歐洲旅行大片！
澳門科學館 ＆ 必影「心形樹」：情侶浪漫散步
由世界級建築大師貝聿銘設計嘅澳門科學館，唔單止係親子放電好去處，科學館外嘅海傍仲隱藏咗一棵爆紅嘅「心形樹」！同另一半企喺樹下，以廣闊海景為背景打卡，浪漫指數絕對爆燈。
- 地址： 澳門孫逸仙大馬路
- 開放時間： 上午 10 時至下午 6 時（下午 5 時 30 分停止售票，逢星期四及農曆年除夕休館，公眾假期照常開放）
觀音蓮花苑海濱漫步：親子放電遊樂場
觀音蓮花苑（觀音像）絕對係新口岸區嘅標誌性地標！高達 20 米嘅青銅觀音像矗立喺海中心嘅蓮花座上，充滿寧靜祥和嘅氣息。沿住孫逸仙大馬路向觀音像方向漫步，吹住海風，睇住日落晚霞，係感受澳門寧靜一面嘅最佳方式。如果係一家大細嚟玩，休憩區內仲有超大型兒童遊樂場畀小朋友放電！
住在新口岸：海景與歐陸度假風
新口岸區地理位置優越，擁有多間極具特色兼坐擁靚景嘅高質海景酒店，絕對可以為你嘅週末假期叉足電：
1. 澳門雅辰酒店 (Artyzen Grand Lapa Macau)：葡國風情
想喺市區感受東南亞 Resort 風情？雅辰酒店絕對係首選！酒店充滿濃厚嘅土生葡人文化氣息，最正係擁有一大片極具異國風情嘅戶外熱帶花園同恆溫泳池。朝早落去游個水，歎個靚早餐再出發，完美演繹慢活假期。
2. 澳門漁人碼頭勵宮酒店 (Legend Palace Hotel)：無邊際海景房
如果你追求奢華嘅歐陸宮廷風，勵宮酒店一定滿足到你！酒店位於漁人碼頭內，部分客房更附設超大露台，可以直接飽覽無邊際海景。行去周邊嘅海濱食肆同打卡景點超級方便，夜晚喺露台吹吓海風，感覺猶如置身歐洲蒙地卡羅一樣！
新假期編輯貼士
「2026澳門國際美食之都嘉年華」絕對係今年不可錯過嘅盛事！編輯建議大家星期六朝早搭船直達「外港客運碼頭」（一落船就係新口岸區，超方便！），Check-in 後直擊嘉年華食晏，黃昏去漁人碼頭打卡，夜晚再歎餐正宗嘅葡國菜。
趁住週末，一於買定船飛或車飛，跟住呢個新口岸攻略，為自己同家人規劃一個大滿足嘅美食假期啦！
