復活節好去處｜西九咖啡節回歸！80+本地海外品牌世界冠軍咖啡師雲集

冠軍級咖啡師坐鎮！雲集80+本地海外過江龍品牌

今次活動陣容絕對是星光熠熠，匯聚超過80個本地、內地同國際品牌，當中不少更加係首次登陸香港！最矚目的一定係多位世界級冠軍咖啡師親身坐鎮，包括創立「4:6沖煮法」而聞名全球嘅2016年世界沖煮大賽冠軍粕谷哲、2025年世界沖煮大賽冠軍Captain George、2022年世界咖啡品鑑師大賽冠軍Moon Heon-gwan等，陣容強大！

除咗國際大師，香港嘅代表性咖啡師亦會現身，好似2024香港咖啡師大賽冠軍Gary Au、兩屆香港咖啡師大賽冠軍Laughing、2021年香港咖啡沖煮大賽亞軍Jasper Yiu等，同大家交流心得。現場仲有來自挪威、被《紐約時報》形容為「值得專程前往的世界級咖啡店」FUGLEN、東京極淺焙名店GLITCH COFFEE & ROASTERS等過江龍品牌，一次過就可以試勻世界各地嘅頂級靚啡。

唔只飲咖啡！4日限定主題日：音樂、親子、寵物、健康

今次嘉年華橫跨四日，每日都有唔同主題，將咖啡融入生活唔同場景，無論你係邊個，都總會搵到啱玩嘅嘢。

• 4月3日 音樂日： 由資深音樂人帶來黑膠廣東歌分享，再由人氣DJ Tiga、DCR Milda接力，將北美新興的「咖啡派對文化」帶到西九草坪，打造全港最大型的戶外音樂咖啡派對。
• 4月4日 兒童節親子主題： 聯乘本地足球文化平台MMX，帶來足球體驗同親子競技比賽，人氣足球女將楊浩兒（Manchester Yeung）更會現身同大家互動，最啱一家大細放電。
• 4月5日 健康生活日： 聯乘國際運動生活品牌，於大草坪上帶嚟戶外瑜伽體驗，透過五感冥想同伸展，在自然同城市節奏之間搵到平衡。
• 4月6日 毛孩友善日： 活動最後一日會聯同動物之心（Animals Sum）舉辦「動力全開毛孩運動會」，設有「動感搖尾挑戰」、「神速合拍大比拚」等多個互動比賽，毛孩贏咗更有機會拎走總值超過$1,000的獎品！現場仲有泰國人氣角色「Wednesday」主題裝置，記得同主子一齊去打卡！

咖啡雞尾酒挑戰賽＋人氣美食酒吧進駐

飲啡之餘，更可以睇比賽同食好西！大會首次舉辦「咖啡雞尾酒挑戰賽」，邀請咖啡同調酒愛好者同場較量，以香記咖啡Silver Mona咖啡豆同香港本地氈酒品牌N.I.P無名氏的氈酒為基礎，創作獨特的Coffee Cocktail，冠軍更可獲總值超過HK$5,000嘅獎品。
現場更有多間人氣餐飲品牌進駐，好似意式餐廳Mother Of Pizzas、法式餐飲品牌 PANO、西班牙料理EatGoodSpain、成日大排長龍的龍霸 by 麥子，以及米芝蓮推介意式雪糕店Snack Baby Gelato & Drinks。酒精方面，除了N.I.P，曾奪得Asia’s 50 Best Bars榜首嘅雞尾酒吧The Old Man亦會登場，大家可以喺草坪上一邊歎咖啡，一邊享受美食美酒。

門票詳情