滙豐銀行突推新收費｜櫃位打簿盛惠$50入支票逐張計！網民鬧爆：迫長者用手機？

滙豐新例5月殺到 櫃位打簿入票樣樣收錢

滙豐銀行宣布，由今年5月1日起，不設最低存款要求的個人綜合理財戶口、個人客戶和滙豐One戶口客戶，將面臨一系列櫃位服務新收費。以往客戶在分行櫃位存入15張或以下支票可獲豁免收費，但新制下將改為每張支票均收取5元手續費，對需要頻繁入票的小商戶或自由工作者影響甚大。更震撼的是，客戶若使用分行櫃位更新存摺紀錄（打簿），以往免費的服務將改為每次收取高達50元費用。此外，因存款不足而導致的退票費用亦有上調，港元及美元戶口收費由165港元加至180港元；人民幣戶口則由220元加至240元，可謂百上加斤。

滙豐銀行解畫豁免條件 6類人士可幸免

面對排山倒海的質疑，滙豐銀行亦列出多項豁免安排。首先，高端客戶如滙豐環球私人銀行、滙豐卓越理財尊尚及滙豐卓越理財客戶，將可繼續免費使用相關櫃位服務，不受影響。同時，銀行亦強調新收費是為了鼓勵客戶多使用電子或自助渠道，市民如使用「入票易」存款機或其他非櫃位渠道存入支票，則不會被收取任何費用。另外，為照顧社會上有需要人士，有6類人士可獲豁免所有相關新收費，包括18歲以下或年滿65歲或以上之人士、長者卡持有者、綜合社會保障援助受助人、政府傷殘津貼受助人，以及身體傷殘或視覺有障礙的人士。若支票金額低於5港元，手續費亦可獲豁免。

網民洗版鬧爆滙豐 「食水深到離譜」

新收費政策公布後，網上討論區及社交平台瞬間被憤怒的留言洗版，輿論幾乎一面倒狠批滙豐「搶錢」。不少網民認為新措施是針對不懂使用電子理財的長者：
「擺明蝦啲唔識用機嘅老人家！打簿都要收$50？」
「好多老人家唔識用ATM同App，迫佢哋俾錢？」
「$50打簿真係痴線，食水深到X街！」
亦有小商戶大吐苦水：
「做小生意日日入票點算？成本大增！」
「係咪想迫走啲細客，淨係服務有錢人？」
「轉會去第二間算，大把銀行揀！」
不過，亦有少數網民認為銀行的做法可以理解：
「其實係鼓勵大家用電子服務，環保啲又慳人力。」
「唔想俾錢咪自己行去入票機囉，好難咩？」