存酒人︱朱栢謙Sica求開續集 爭取原班人馬做一件事圓夢！

朱栢謙盼開音樂會

《存酒人》除了劇情動人，由波多野裕介（Yusuke）操刀的配樂與劇中歌曲亦是靈魂所在。飾演「市井」老闆雄哥的朱栢謙稱自彈自唱只屬「呃飯食」，「多謝大家抬舉錯愛，我覺得《存酒人》對我嚟講係一道好重要嘅痕跡，我覺得係做咗一件好勁嘅事。我哋喺戲院睇（大結局）都覺得好有電影咁，好犀利！所以希望大家可以畀我哋場地呀、酒精呀…希望有一個音樂騷，感覺上相對圓滿啲。」朱栢謙希望《存酒人》拍續集：「我真係好耐冇睇過一套咁正嘅電視劇，佢係單元式但穿插住一啲長嘅線，我覺得真係好正！音樂又真係冇得講，好勁，Yusuke（波多野裕介）真係好犀利！」

Sica努力爭取出歌

被問及《存酒人》團隊希望能舉行music show及出OST，將波多野裕介的音樂及劇中曲目重新呈現，曾在劇中單元獻唱的Sica亦表現雀躍，她對於網民強烈要求推出她主唱的《藉口太多》：「我哋都想努力爭取！希望公司可以提供，或者各位客戶可以提供場地啦、酒精啦……歡迎sponsor！」陳子豐謂當日也有機會參演《存酒人》，可惜工作撞期，遺憾未能演出，「如果再有機會參與佢哋嘅製作感就好好喇！」

Hanna林千渟讚Lokman呼風喚雨

除了朱栢謙與Sica，同場的《喜劇開場》女主角陳漢娜、林千渟及許月湘，其實全都參演過《存酒人》。Hanna在第二集單元飾演失眠女生「阿芯」，她坦言拍攝時已感受到劇組的氛圍：「我喺《存酒人》只係其中一個單元，但我好羨慕佢哋個團隊，真係好難得。如果有機會開續集，我好想同佢哋一齊玩！」在劇中飾演被欺凌學生的林千渟及暗戀老師的許月湘，亦對續集充滿期待。林千渟笑言：「《存酒人》係ViuTV請得最多演員嘅一套劇，如果添食我哋會勁開心！」她更幽默表示，若有續集自己角色都要有成長：「講到續集，我會長大㗎啦，唔做學生啦！」林千渟在《存酒人》單元穿校服示人，她稱《喜劇》都有，另三女又表示要讚楊樂文有呼風喚雨的能力，「我哋講咗一定要喺個訪問裏面大讚佢！」