年尾大餐好好獎勵自己！青衣城4間必收藏餐廳：獨特泰式料理/日本職人料理

年尾「泰」識食｜泰作 秘製特色料理

主打獨特泰式料理嘅「泰作」，利用秘製食譜研發出地道美味嘅料理！推介必食嘅「泰香泰式MaMa燒鍋」，可以任選大人小朋友都鍾意嘅香茅豬頸肉、椰汁香茅雞肉、秘製和牛粒、鮮味十足嘅大蝦、惹味餐肉、金菇等配料，配上蔬菜及撈麵，食落大滿足！

介紹埋正宗嘅食用方法啦！先用有機香料喺鍋中爆香，隨後再加入心儀嘅配料，炒至香口惹味，即可放喺鍋邊慢慢享用！之後再倒入店家自製冬陰功湯，配上泰國MAMA撈麵，一鍋兩食，將泰式風味發揮得淋漓盡致，真係要講一句「泰」好味喇！

泰作

地址：青衣城1期 3樓302號舖

一個人食都可以盡興！｜東京一人火鍋店 LE-TA-SU

就算係獨食都充滿儀式感！日本超人氣「LE-TA-SU」火鍋專門店，集合不同嘅套餐俾大家選擇，而且店舖啱啱新開張，緊係要率先嚐鮮一下啦！

招牌必試「LE-TA-SU套餐」集齊美國特選安格斯牛肩胛肉、美國豬肉眼及牛舌，肉質鮮嫩，一次過歎盡3種肉嘅滋味，啱晒各位食肉獸！想享受更豐盛嘅大餐？亦可選「海鮮盛配牛肉/豚肉套餐」，可以自行選擇牛五花或豬肉眼，仲有精選海鮮㗎！當中特製嘅「明太子墨魚滑」超推介，食過返尋味，盡享海陸滋味！

加碼！一個人都可以食豪啲～「特選壽喜燒套餐」選用九州產和牛肩胛肉、澳洲純種和牛牛板腱及美國特選安格斯牛肩胛肉，鍾意食牛嘅你絕對不容錯過！

LE-TA-SU 一人一鍋（12月22日開始試業）

地址：青衣城1期 3樓322B號舖

品嚐日本職人精湛廚技｜千両日式料理 匠心之作

深受大眾愛戴嘅「千両」一直堅持「不時不食」的精神，搜羅最當造的優質食材，以「職人」的精湛手藝為大家呈獻最新鮮而有誠意嘅壽司料理，立即睇以下推介menu啦！

「千両職人壽司拼盤」由職人匠心製作，包含：大吞拿魚腩配海膽、千両壽司、江戶前自家製甜蛋 (柚子風味)、真鯛配鹽昆布、炙燒赤海蝦配烏魚籽以及池魚配柚子胡椒蔥醬，每款都別具特色！

想品嚐最原始嘅鮮味？「千両直送魚鮮七點盛」特別挑選7款來自產地直送嘅魚鮮，配搭豪華嘅海膽醬油，歎盡7種鮮味！

秋冬想食啲暖笠笠嘅菜單亦可以選擇「A4黑毛和牛壽喜燒」！入口即融嘅和牛，配上鮮甜壽喜燒汁，冬日暖胃極致享受！

千両（12月23日正式開幕！）

地址：青衣城1期 3樓322B號舖

得獎食府名菜｜大榕樹下 品嚐地道順德風味

國內得獎食府「大榕樹下」，由國內師傅駐場監修，保證為大家炮製出最正宗嘅順德風味！

當中必點金獎名菜「順德豉味碌鵝」，嚴選來自廣東清遠嘅黑鬃鵝，油脂均勻，並以三十多種香料嘅秘製醬汁慢煮而成，鵝肉嫩滑，味道濃郁！

另外，亦有多款經典順德菜，包括：香口嘅咸蛋黄啫鮮蝦、大人小朋友都鍾意嘅大良炸脆奶、酸甜開胃嘅菠蘿咕嚕肉等，全部都能盡顯師傅功架，大飽口福！

大榕樹下

地址：青衣城1期地下G01號舖