懷舊遊戲變社區神器｜滙豐銀行慈善基金 × 惜食堂推「餐餐友得玩」幫公公婆婆搵返快樂日常

根據滙豐銀行慈善基金同惜食堂合作嘅「香港長者孤獨感調查」，有三分之一老人家話自己覺得孤單，加上運動量少、出街社交機會又減少，長遠影響身心健康。滙豐銀行慈善基金今次就聯同惜食堂，推出咗一套好有香港味嘅「餐餐友得玩」三合一遊戲套裝，用懷舊設計加互動玩法，等老人家可以一邊回憶、一邊郁下身、一邊同人傾下偈，搵返快樂日常。

滙豐踩過界！由銀行服務變身成社區玩具師？

滙豐銀行慈善基金一直都有支持惜食堂嘅膳食支援工作，早前更資助擴建速凍飯餐設施，令速凍飯餐供應量提升六成，幫到更多有需要嘅老人家。到咗今年，滙豐銀行慈善基金再進一步「踩過界」，推出「餐餐友得玩」三合一遊戲套裝，針對老人家嘅孤獨感同活動量不足嘅痛點。

套裝入面有三款遊戲：「回憶對對碰」、「袋袋腦平安」同「人人疊羅漢」，分別可以訓練記憶力、手眼協調同社交互動。由銀行搞到出玩具設計，真係好出乎意料，但亦證明咗企業做社會責任唔再只係捐錢，而係真係走入社區、了解實際需要。

三分之一老人家感孤單　懷舊玩具成最暖心療癒

根據「香港長者孤獨感調查」，反映出有34% 老人家覺得孤獨，只有42%老人家話有依靠，仲有唔少人話自己成日煩躁、無助、焦慮。再睇深啲，只有3成半老人家會定期做運動或者玩遊戲，而照顧者大多時間都用喺煮飯、傾偈，真正會同老人家一齊郁動嘅比例得 6%。

當活動少、社交減，身體自然容易退化，「心」都會慢慢收埋。呢個時候，懷舊就成為一種最自然嘅療癒方式。「餐餐友得玩」用六、七十年代嘅復古風設計，令公公婆婆一見就覺得親切。「回憶對對碰」仲會用香港地標、老店、懷舊物件嚟配圖，玩嘅時候又訓練腦，又勾返起一啲珍貴回憶。

「袋袋腦平安」用咗六個熱感豆袋，可以玩拋接等，訓練手部肌肉又唔辛苦；「人人疊羅漢」就係迷你版經典堆積木遊戲，老人家輪流對戰，邊玩邊傾笑聲連連。當社區會堂傳出陣陣歡笑聲，就知道呢啲互動，已經變成最真實嘅社區暖流。

由送暖飯到送笑聲 讓關懷成為日常

滙豐銀行慈善基金同惜食堂合作多年，由「送飽飯」到「送歡笑」，一步步將關懷由物質層面帶到心理層面。呢套遊戲唔止幫老人家對抗孤獨，仲可以延緩記憶力退化、訓練專注力、促進社交。

其實關心老人家，唔一定要大動作。有時候，只要陪佢哋玩一陣，聽佢講多句，都已經足夠。細個玩過嘅遊戲，今日變成公公婆婆嘅快樂秘方，呢份情，正正就係香港最珍貴嘅人情味。

（資料由客戶提供）