《愛回家》36歲「最索秘書」豪宅露台驚變菠蘿田 紫色小背心上陣騒Fit爆身材勁搶Fo

謝芷倫豪宅露台驚現菠蘿田 紫色小背心落手收割

謝芷倫（Jan）近日喺社交平台上載短片，驚見佢化身「都市農夫」，喺自家豪宅嘅超大露台上演一場菠蘿收成記！片中見到，身穿紫色貼身小背心嘅謝芷倫，戴上手套，手起刀落，動作純熟咁剪下三顆金黃飽滿嘅菠蘿，完全唔似新手。佢興奮留言：「竟然可以剪咗兩條片，種嘢仲要剪片，我唔係讀調理農務系架喎」，更透露呢幾顆菠蘿係心血結晶，由2023年8月開始種植，係「兩年前三棵側芽生成嘅菠蘿」，等足兩年終於有收成，難怪佢成就感爆燈！

謝芷倫2021年嫁入豪門 闊太生活奢華寫意

現年36歲嘅謝芷倫，最為人熟悉嘅就係喺TVB處境劇《愛·回家之開心速遞》中飾演大小姐秘書「Mandy（林美香）」一角成功入屋。不過自從2021年12月，佢同從政嘅圈外男友馬志恆結婚後，就榮升人妻兼闊太，隨即淡出幕前，專心享受少奶奶生活。婚後謝芷倫不時喺社交平台分享佢嘅富貴日常，生活相當寫意，除咗經常出入遊艇會，仲會打Golf、餵馬，估唔到動靜皆宜嘅佢，竟然對農務都咁有心得，今次嘅菠蘿收成，可見佢嘅闊太生活非常充實多元。

網民錯重點激讚身材 狂派心心洗版：好Fit

謝芷倫嘅收成短片一出，即刻引嚟大批網民留言，唔少人大讚佢多才多藝，簡直係「入得廚房，出得廳堂」嘅完美人妻！網民紛紛留言：「好犀利，竟然喺屋企種到菠蘿！」、「睇落好甜咁喎！」。不過，更多網民將焦點放喺佢嘅Fit爆身材上，身穿紫色小背心嘅佢，盡顯纖腰同健康肌肉線條，令唔少網民錯重點大讚：「身材仲搶鏡過啲菠蘿！」、「好Fit呀！」、「完全唔似結咗婚」，留言區被心心emoji瘋狂洗版，人妻魅力沒法擋！