港女慶祝母親節 食一半被要求調檯惹議 餐飲同行細數最怕4類客人
港女母親節食到一半被要求調檯
事主在Threads上以「想知係咪得香港先咁癡線，係餐廳食到一半比侍應叫調檯」為題發文，她表示母親節當日晚市一早到餐廳攞位，其後安排入座後就與奶奶及女兒三人坐於近門口的中檯，落單叫了4樣餸菜，食物很快就到齊。正當三人享受晚餐時，突然有位中年男員工走過來，查問人數後要求她們搬到隔離細檯。事主坦言望住枱面一半未食完的餸菜，實在不願意搬，並向員工表明立場。其後員工不斷重複指事主只有3人，並解釋是「其他員工一開始安排錯位比我地」，事主當然拒絕配合，並質疑入座後有多名員工服務過：
「如果係開錯檯點解唔一早講，要等到客人食咗一半先叫調位？」
事主炮轟：唔好怪人北上消費
雙方持續拉鋸，甚至後來附近有空檯都出現，該名男員工依然堅持要求搬位。直到一位女員工出面：「唔好嘈啦，張檯係老細開比佢地。」事件才暫告一段落。事主對該名男員工的態度和行為表示質疑，並表示如果入座安排非老闆指示，或是體型較大的食客，是否仍會被強行要求調檯，不禁感慨：
「有時真係唔好怪人北上消費，起碼食餐飯唔洗食到好似流水席咁先。」
同行細數最怕遇到4類客人
帖文發佈後引起網民熱烈討論，甚至引來餐飲業員工分享，表示母親節最怕遇到以下4類客人：
- 不滿被安排轉枱，堅持「坐定唔郁」；
- 超時逗留，無視訂枱時間限制；
- 臨時加位或帶多親友，要求即時安排；
- 對服務有高要求，稍有不滿即投訴。
有員工坦言：「節日真係寧願唔做都唔想再經歷，因為一日內要處理太多突發情況，客人又唔體諒。」
網民一面倒狠批涉事餐廳及員工
批評店員態度惡劣，欠缺尊重食客
不少網民認為餐廳要求食客中途調檯的做法離譜，欠缺對顧客的基本尊重，特別是店員態度惡劣加劇問題。有人留言：「係香港先會出現呢啲嘢，錢可以搵，但畀啲尊嚴食客得唔得，食食下叫人搬枱」、「某啲食肆食相真係好難睇」，並指若店員態度好一點，如「好有禮貌咁問，唔好意思，今日比較忙，請問你哋介唔介意調一調，應該好多人都肯調，或者送杯嘢飲，送個小食」，情況或會不同，但「態度咁，老虎X都唔會理佢」。另有人支持事主立場：「食緊既話我都唔會想搬，所以我支持你諗法」、「已經上哂菜都唔怕佢加料，死都唔掉檯」。
批評餐廳管理混亂，趕客行為自毀生意
有網民指出事件反映餐廳管理問題，員工短視行為損害生意。有人分析：「根本有好多食肆都係比自己d員工搞死，懶醒以為幫老闆賺多幾蚊，實質做法就好趕客，好景果陣就揀客，到真係無生意就叫春怪責人地北上消費，不如諗諗自己點對d客先」。此觀點認為，餐廳若不改善服務態度，將繼續流失顧客，難怪有人選擇北上消費。
分享類似經歷，質疑服務質素
有部分網民分享類似遭遇，批評餐廳服務質素低劣，甚至「連服務都無」。有人表示：「昨日個員工差在未夾我哋過去，最後仲要望到佢X住我哋走，呢啲已經稱唔上服務質素，係連服務都無」。另一網民提到：「我都試過類似嘅情況，1條友去食飯，搬咗2次之後，有人叫我搬第三次（每次都唔同人叫）」，但因餐廳最終提供八折優惠而接受，顯示若店家「識做」，顧客或願妥協。網民普遍認為：「連基本服務態度都沒有，幾好食都唔會光顧！」。
