7間高質大閘蟹套餐推介! 6折優惠食6道菜+7両蟹皇+蟹粉宴|區區搵食
7間高質大閘蟹套餐推介! 6折優惠食6道菜+7両蟹皇+蟹粉宴|區區搵食

7間高質大閘蟹套餐推介! 6折優惠食6道菜+7両蟹皇+蟹粉宴|區區搵食

「打算食幾多次?」、「食幾大?」、「公定乸?」、「應該食邊間?」每年秋天,這幾個問題都會不停在朋友間的WhatsApp、IG 內縈繞。一年一度的大閘蟹季又開鑼,所謂「九月圓臍十月尖」,金香爆膏的肥蟹應市期甚短,加上身體quota有限,要吃,當然要挑最好。怎樣吃才算又平又正,今期為你找來城中7間供應大閘蟹套餐的食店,有平有貴,總有一間合你心水。

Text:Lisa|Photo:官方圖片、新傳媒資料室

7間大閘蟹套餐推介

1. 尖沙咀龍苑中菜廳
6折食6道菜蟹宴

一聽到去酒店食大閘蟹宴,以為會好貴,原來細心留意,隨時都發現激筍優惠。好似尖沙咀金域假日酒店中菜廳龍苑,今年就以特價推出大閘蟹餐,6道菜加甜品,原價每位近9百蚊,現在6折就食到,連加一,每人都只是$550左右。除了包一隻4.5-5両重的北海道大閘蟹外,還有蟹粉小籠、蟹粉烏冬,甚至連矜貴的燕窩都有,用蟹粉蟹肉加高湯煮成,鮮味又養顏。

想食得刁鑽點,另有散叫菜式,好似陳年花雕鹽焗大閘蟹,坊間較少吃到,鹽焗之後,大閘蟹食起來肉質更甜美,而且散發淡淡酒香。又或者可以試試金沙大閘蟹,蟹身沾滿惹味的鹹蛋黃碎,令大閘蟹變得非常惹味,尤其揭開蟹蓋,見到金黃蟹膏,入口時,真、假鹹蛋黃各領風騷,十分邪惡,卻又十級美味。

大閘蟹
每人不用5百蚊,就可以享用6道菜大閘蟹套餐,當中除了甜品及高湯斑球外,其餘菜式都加入大閘蟹,蟹迷一定like。

「蟹」逅在龍苑($498/位)

• 生拆蟹粉小籠包
• 蟹粉蟹肉高湯燴燕窩
• 紫蘇蒸大閘蟹(1隻)
• 吉列大蝦球配蟹皇醬伴蒸花卷
• 鮮淮山胡椒高湯浸斑球
• 蟹粉燴稻庭烏冬
• 黑糖薑茶湯圓

紫蘇蒸大閘蟹($498/位,大閘蟹套餐菜式之一)
來自北海道的大閘蟹每隻約有4.5-5両,配紫蘇葉來蒸,不止可以驅寒,吃起來多膏味又鮮。
吉列大蝦球配蟹皇醬 ($498/位,大閘蟹套餐菜式之一)
脆卜卜的蝦球,本身已經夠彈牙,吃時蘸點用蟹粉煮成的蟹皇醬,同時將蝦蟹的鮮味混於一身。
蟹粉燴稻庭烏冬 ($498/位,大閘蟹套餐菜式之一)
煙煙韌韌的烏冬很掛汁,一箸入口,將蟹粉的甘香,一啖吞入肚。
蟹粉蟹肉高湯燴燕窩 ($498/位,大閘蟹套餐菜式之一)
橙黃的湯汁,一望就知足料,燕窩矜貴輕淡,剛好與鮮美的蟹粉蟹肉成為絕配,味道清而不寡。

龍苑中菜廳@金域假日酒店

地址:尖沙咀彌敦道50號金域假日酒店低層一樓(顯示地圖
電話:2315 1006
供應期限:即日至11月底
營業時間:11am-3pm、6pm-11pm
酒店官方網頁按此
Fb專頁:Holiday Inn Golden Mile
備註:① 套餐須預早一日預訂,兩位起
② 設加一、收信用卡

2. 鰂魚涌東海酒家
$400每人兩隻5両半蟹+8道菜

同朋友食大閘蟹是秋日限定的社交節目,有男有女,人又多,自然希望大件夾抵食,好味得來要飽肚,東海的大閘蟹套餐算是好選擇。最抵的「大閘蟹·盛宴」足4位用,連甜品共有9道菜,而且每人可以獨享兩隻重5両半的大閘蟹,計起來,每人才4百蚊左右,好抵食。蟹源方面,首批來自東北,因為天氣較冷,蟹比較成熟,大約11月中,大廚又視乎貨源供應,轉回使用江蘇蟹,務求肉甜膏多。

大閘蟹 ·盛宴($1,488/4位)

• 東海兩小碟(百味豆腐、干煸四季豆)
•鮮味蟹粉小籠包(每位1隻)
•東瀛花菇螺頭燉雞湯
•清蒸大閘蟹(每位2隻)
•生拆蟹粉蒜蓉包( 每位1件)
•蠔皇花膠扣玉掌
•脆皮醬油雞
•酸辣肉燥手打烏冬
•薑茶湯圓

清蒸大閘蟹$138(約5両半)
季初會使用內地東北蟹,待貨源穩定可能轉用江蘇蟹,大廚會根據供應決定來貨。

位位4百蚊的套餐,菜式很豐富,當中最吸睛就是蟹粉蒜蓉包,將熱辣辣的蟹粉塗滿在即焗蒜蓉包上,香噴噴,脆口又鮮味,加埋蟹粉小籠,一咬爆汁。雖然蟹粉菜式不算很多,但其餘的蠔皇花膠扣玉掌、花菇螺頭燉雞湯、濃湯淮山浸時蔬都是人人啱食的大路餸菜,絕對是朋水聚餐的一流之選。

大閘蟹 ·淺嚐($368/位)

• 鮮味蟹粉小籠包(2隻)
• 生拆蟹粉蒜蓉包(2件)
• 東瀛花菇螺頭燉雞湯
• 清蒸大閘蟹(2隻)
• 濃湯淮山浸時蔬
• 酸辣肉燥手打烏冬
• 薑茶湯圓

鮮味蟹粉小籠包 $38/隻
一隻大閘蟹的蟹粉蟹肉,只夠做3至4隻小籠,隻隻咬開都見到金黃蟹膏,吃得一口鮮。
生拆蟹粉蒜茸包 ($368/位,大閘蟹套餐菜式之一)
將厚厚的蟹粉搽在香脆多士上,酥脆鮮味,食到唔停得口。

東海酒家

地址 : 鰂魚涌華蘭路25號栢克大廈2樓(顯示地圖
電話:2887 7112
供應期限:即日至11月底,視乎供貨而定
營業時間:10:30am-3pm、6pm-11 pm
官方網頁按此
FB專頁:東海飲食集團 East Ocean Gourmet Group
備註:設加一、收信用卡

3.銅鑼灣十里洋場
6道菜蟹粉菜

如果要請朋友食蟹宴,我會揀銅鑼灣利園的十里洋場,不單止地點方便,更喜歡時尚有型的裝修,以30年代大上海為設計藍本,入口處有中式拱形月門,洋溢住東方夜上海的韻味。賣的是淮揚菜,卻又不乏新鮮感,好似大廚特地為今年蟹季創出多款特色菜,除了大路的蟹粉小籠、蟹粉撈飯外,還有不少新元素,如淮揚蟹粉桂魚絲,就是將桂魚起骨拆肉切絲,與蟹黃一起乾煸,魚鮮與蟹鮮相互輝映,亦盡顯淮揚菜精細的刀工。

不過論人氣,蟹粉鍋巴應該最受一家大細歡迎,炸得脆香的鍋巴配上濃郁的蟹粉,鮮味滲入米通中間,好食到唔停得口。除了十多款散點蟹粉菜,亦有大閘蟹套餐,選用5両重的江蘇蟹,6道菜中除了前菜和甜品外,全部都以蟹粉做主角,蟹迷來到,一定食得過癮。而且凡惠顧大閘蟹套餐,都可以$50享用會稽山花雕酒(廿年)一壺,有酒有蟹,夠滋味。

十里洋場大閘蟹套餐($738/位)

• 前菜任選1款:蜜汁脆黃鱔、金絲小排骨、陳醋紅蜇頭、雞絲粉皮、四喜烤麩、私房陳皮牛肉、上海醬蘿蔔、鎮江水晶肴肉
• 城隍廟蟹皇翅
• 清蒸大閘蟹(5両)

• 鮮蟹粉鍋巴
• 淮揚蟹粉桂魚絲
• 生拆蟹粉鮑魚撈飯
• 薑茶芝麻湯圓

清蒸大閘蟹($738/位,大閘蟹套餐菜式之一)
約重5両的江蘇蟹,肉甜膏多。
蟹粉鍋巴($738/位,大閘蟹套餐菜式之一)
將鮮拆蟹粉放在即炸鍋巴上,入口鬆脆,大人小朋友都啱食。
白汁年糕大閘蟹 $480
上海年糕煙韌軟糯,大廚將蟹開半煎香,加酒及上湯燜煮,再放入其他配料同煮而成。
生拆蟹粉小籠包$180/4件
咬開即滲出點點蟹油,外皮透薄,肉汁香甜又帶蟹香,必食!

十里洋場

地址:銅鑼灣恩平道28號利園二期101號舖(顯示地圖
電話:2338 5500
供應期限:即日至11月底
營業時間: 星期一至四11:30am-3:30pm、6pm-11:30pm;星期五11:30am-3:30pm、6pm-12:30am;星期六及公眾假期11:30am-4:30pm、6pm -12:30am;星期日11:30am-4:30pm、6pm-11:30pm
官方專頁按此
FB專頁:十里洋場 10 Shanghai
備註:設加一、收信用卡

4.中環奧卑利
加$300升級至7両蟹皇

不少香港人,每年可能只給自己一個quota食大閘蟹,那麼就狠狠地吃一次最勁的﹗重量級7両爆膏北海道蟹皇能夠滿足你嗎?中環高級江南菜館奧卑利就能夠滿足你,雖然新近推出的8道菜大閘蟹套餐,只包一隻五両半北海道蟹,不過只要另加$300,即可升級至7両蟹,食起來肉質更結實,蟹膏亦更多。

清蒸北海道大閘蟹 (五両半$480、六両半 $680)
散點一隻大閘蟹已近$500,8道菜大閘蟹套餐,包一隻五両半蟹,才$988,精明眼自然識揀。
蟹粉黑豚肉小籠 ($988/位,大閘蟹套餐菜式之一)
小籠包特別,選用黑豚,肉質嫩滑得來又不會有肉臊味,配足料蟹粉,湯香味鮮。

唔食套餐,亦有14款菜可供散點,單是蟹粉小籠包都有含豬肉($188/4隻)及不含豬肉($128/4隻)兩款,前者用上彈牙的黑豚,湯汁香濃。想再吃得豪華點,不妨來個蟹粉粉皮($1,888),每碟平均用上4-5隻公蟹拆膏而成,加入粉皮快兜,黏口甘香,每寸粉皮都沾有鮮味蟹粉,啖啖奢華。奧卑利位於中環歷史建築大館之內,設寬敞室外露台,可飽覽大館庭院的景色,參觀古蹟後來吃一餐,是秋日的好節目。

蟹粉豆胚 $328
秋天的豆胚又脆又嫩,與鮮味蟹粉配搭起來,立時生色不少。
蟹粉河蝦仁 $438
爽彈河蝦與蟹粉融為一體,拌飯吃一流。

奧卑利

地址 :中環奧卑利街大館賽馬會藝方2樓(顯示地圖
電話:2877 8711
供應期限:約11月中,視乎供貨而定
營業時間:12nn-11pm
官方專頁按此
FB專頁:Old Bailey 奧卑利
備註:① 設加一、收信用卡
② 套餐必須提前預訂

5.尖沙咀桃里
8頭鮑配雙飛日本大閘蟹

大閘蟹套餐的市場競爭激烈,每間餐廳食店都扭盡六壬吸客,將高級食材放入套餐內,令客人覺得矜貴又抵食。千禧新世界香港酒店旗下中菜廳桃里今年就將8頭南非鮑魚及燕窩加入大閘蟹餐中, 加上每位獨享兩隻大閘蟹, 二人價$1,980,價錢合理!大廚選用質素穩定的日本蟹,天然純淨,膏香肉甜,無論原隻食,還是拆蟹粉做小籠包、海皇羹,都甘香鮮味。

精選大閘蟹套餐($1,980/2位)

• 桃里四小碟(蒜片牛柳粒、花雕醉豬手、凍話梅番茄、青瓜木耳)
• 紅燒蟹粉海皇羹
• 清蒸大閘蟹(每位2隻)
• 蠔皇原隻南非八頭鮑魚扣玉掌唐生菜
• 蟹粉小籠包
• 四川擔擔麵
• 燕窩燉蛋白

清蒸大閘蟹
6両重的日本大閘蟹,蟹膏多,肉質也結質鮮甜,享用二人價$1,980的套餐,更每人可獨食兩隻。

人多的話,亦可考慮多點幾個蟹粉菜,蟹粉燕液帶子石榴粿($218/2件),聽菜名就知工序繁複,用晶瑩透薄的蛋白皮包裹蟹粉、帶子及白菌,最後加上矜貴燕窩、蟹黃作點綴,好睇又好食。又或者原籠蟹粉大閘蟹糯米飯($498),將6両蟹放在瑤柱、北菇、蝦米的糯米上蒸,蟹的鮮甜配上惹味煙韌的糯米飯,吃時拌以甘香濃厚的蟹粉醬汁,食一碗應該唔夠喉。

原籠大閘蟹蟹粉蒸糯米飯$498
糯米飯吸收了蟹汁的鮮味,煙韌有咬口,原籠上枱,更加原汁原味。
蟹粉大閘蟹水晶粉煲 $488
水晶粉滑嘟嘟,條條蘸滿金黃蟹粉,一滑入喉。
裝修開揚舒服,還可以飽覽維港景色。

桃里@千禧新世界香港酒店

地址:尖沙咀東部麼地道72號千禧新世界香港酒店2樓(顯示地圖
電話:2313 4222
供應期限:即日至12月31日
營業時間: 星期一至六12nn-2:30pm、6:30pm-10:30pm;星期日及公眾假期 10:30am-2:30pm、6:30pm-10:30pm
酒店官方網頁按此
FB專頁:New World Millennium Hong Kong Hotel 千禧新世界香港酒店
備註:設加一、收信用卡

6.尖沙咀東來順
京菜名店推貴價大閘蟹宴

來自北京的老字號,人人只知其涮羊肉細嫩幼滑,原來淮揚菜一樣出色。今年推出的大閘蟹套餐,索價$1,380,不便宜,但勝在貨真價實,大廚手工紮實。多款菜式中,除了花膠三絲羹和薑茶湯圓外,其餘都以蟹肉為主角。蟹粉斑球、蟹粉豆腐、蟹粉時蔬、蟹粉小籠,固然啖啖足料,就連單款前菜都各有特色:牛油果蟹肉蟹子沙律,爽脆清新;蟹肉蟹粉銀絲卷,濃香惹味;蒸蛋白酒釀蟹鉗,酒香飄逸,全是精品之作。

御品大閘蟹宴2019($1,380/ 位,2位起)

• 醉人蟹后(牛油果蟹肉蟹籽沙律、蟹肉蟹粉銀絲卷、蒸蛋白酒釀蟹鉗)
• 清蒸大閘蟹(每隻5両半)
• 花膠三絲羹
• 蟹粉海斑球
• 蟹粉豆腐
• 蟹粉扒時蔬
• 黃金蟹粉小籠包
• 薑茶湯圓

清蒸大閘蟹($1,380/位,大閘蟹套餐菜式之一)
大廚選用江蘇蟹,會視乎不同季節,轉換產地。
蟹粉豆腐($1,380/位,大閘蟹套餐菜式之一)
濃鮮的蟹粉和豆腐從來都是好朋友,𢳂一大羹用來拌飯,很滿足。
黃金蟹粉小籠包($1,380/位,大閘蟹套餐菜式之一)
蟹粉小籠自然是蟹宴必食的,每隻小籠封口位都見到蟹粉溢出,真材實料,可見一斑。

不吃套餐,亦有六、七款蟹粉菜式可以點,其中最正當然是清炒蟹粉($488),記得要大大羹放入口,才夠滿足。另外坊間較少吃到的蟹粉粢毛糰($168/3件)亦很特別,用糯米飯包住蟹粉,食法似粢飯糰,味道當然是升級鮮味啦﹗

清炒大閘蟹粉 $488
一直覺得食炒蟹粉是大閘蟹菜式中的頂級享受,而且必須要滿滿一大羹放入口,身體、心靈都覺得無限滿足。
位於尖東帝苑酒店地庫,東來順不止涮羊肉做得出色,大閘蟹餐一樣很有水準。

東來順@帝苑酒店

地址:尖沙咀東部麼地道69號帝苑酒店B2層(顯示地圖
電話:2733 2020
供應期限:即日至11月尾
營業時間:11:30am-3pm、6pm-11pm
酒店官方專頁按此
FB專頁:The Royal Garden 香港帝苑酒店
備註:設加一,收信用卡

7.上海小南國
本幫家常菜大閘蟹宴

上海是吃大閘蟹的好地方,在當地吃蟹,最好配幾道本幫小菜,或者來一壺花雕,就最啱feel。小南國的蟹宴就是以多款地道上海菜式配大閘蟹,風味夠獨特。店子今年有兩款大閘蟹餐,分別$398/位及$498/位,兩個餐都有自選冷盤兩款,湯、原隻大閘蟹,另加3款上海小菜、蟹粉小籠包和湯圓,非常豐富抵食。當中,最推介「清炒生拆蟹粉河蝦仁」,蝦仔細細爽口得來,配襯濃香蟹粉,啖啖滋味。

小南國推出兩款大閘蟹套餐,價錢每位分別$398及$498,都可以自選冷盤、每人一隻大閘蟹、湯、3道主菜、小籠包及甜品,十分豐富。
選用5両重江蘇大閘蟹,蟹膏特別甘香。
特製生拆蟹粉小籠包 ($398/位或$498/位,大閘蟹套餐菜式之一)
小南國的小籠包一向出色,今次加入生拆蟹粉,令湯汁更添鮮味。

另一款吸睛之選是「蝦球生拆蟹粉蒸雪嶺」,滑溜溜的蒸蛋白上有大蝦球及蟹粉醬汁,入口鮮味爽彈。蟹粉菜以外,其他小食包點亦很不錯:醉雞酒香肉嫩、小黃魚香脆可口、蟹粉小籠包皮薄餡鮮⋯⋯以這個價錢來說,性價比很高,值得一試。

套餐A($398/ 位,2位起)

• 自選冷盤(任選兩款)
秋葵拌木耳/紹興花雕醉雞/老上海燻魚/鎮江肴肉/本幫糖醋小排/金瓜絲海蜇/四喜烤麩/薺菜馬蘭頭乾絲
• 清蒸大閘蟹
• 特色餛飩走地雞湯
• 椒鹽小黃魚(每位1條)
• 清炒生拆蟹粉河蝦仁
• 瑤柱扒豆苗
• 特製生拆蟹粉小籠包(每位1個)
• 薑汁芝麻湯圓

套餐B($498/ 位,2位起)

• 自選冷盤(任選兩款)
老上海燻魚/蔥油海蜇頭/鎮江肴肉/本幫糖醋小排/金瓜絲海蜇/四喜烤麩/紹興花雕醉雞/秋葵拌木耳
• 清蒸大閘蟹
• 蝦兵蟹將羹
• 蝦球生拆蟹粉蒸雪嶺
• 獅子開大口
• 蟹粉扒蘆筍
• 特製生拆蟹粉小籠包
• 薑汁芝麻湯圓

蝦球生拆蟹粉蒸雪嶺 ($498/位,大閘蟹套餐 菜式之一)
蒸蛋白上鋪了大蝦和蟹粉,鮮美嫩滑,色香味俱全。
薑汁芝麻湯圓($398/位或$498/位,大閘蟹套餐菜式之一)
食完大閘蟹,少不了呷啖薑湯暖暖胃,用薑汁芝麻湯作甜品,最好不過。

全線上海小南國

供應期限:至12月中
備註:設加一、收信用卡
官方網頁按此
FB專頁:上海小南國 Shanghai Min

嗌外賣,賺機票!亞洲萬里通會員按以下連結登入 foodpanda 叫外賣,即送你高達6,000里數:http://bit.ly/2O1Hq9Q

最新吃喝玩樂資訊