大嶼山週末輕鬆遊  滿足就係咁簡單 | 香港好去處
大嶼山週末輕鬆遊  滿足就係咁簡單 | 香港好去處

大嶼山週末輕鬆遊 滿足就係咁簡單 | 香港好去處

(Presented by Ngong Ping 360 Cable Car)

 

路線一: 昂坪市集 + 大澳日落 + 中秋花燈節

辛苦咗成個星期先等到星期六日放假可以唞唞,就梗係要輕輕鬆鬆嚟個小旅行出走放鬆下啦!近近地去一轉大嶼山玩番日影下相都係一個唔錯嘅選擇。嚟到大嶼山想舒舒服服周圍去玩,搭昂坪纜車先去昂坪市集,玩完再直落大澳是常識吧!

 

識玩就一定係搭昂坪纜車嘅水晶車廂,沿途睇到大自然360度靚景,仲可以睇埋腳下嘅昂坪棧道四周環境,景色一流。

 

昂坪市集慢活之旅

平日生活忙碌,惟有忙裡偷閒周末去郊外遊山玩水,過下寫意人生。無論你係鍾意藍藍綠綠嘅大自然定影相打卡,昂坪360都可以滿足到唔同人士喜好!遠離市中心,昂坪市集環抱大自然,環境清幽恬靜,令人心曠神怡。大家可以輕鬆閒逛市集特色商店,仲可以擊鼓祈求祝福,或者喺菩提樹下許願。暢遊市集期間,拎定相機隨行隨拍紀錄低屬於你同另一半,或者同屋企人最溫馨難忘嘅畫面啦!

 

祝福鼓外形有啲似Q版長洲平安包,好有本土特色同親切感。

 

菩提許願樹下手牽手,許下甜蜜承諾。

 

寫意人生 見證明信片式大澳水鄉日落

想360度玩轉大嶼山,可以去埋大澳水鄉,由昂坪市集出發乘21號巴士,只需約20分鐘就可以到達大澳,方便快捷。要享受人生,就唔可以錯過每個機會欣賞靚景,去得大澳就當然要搵個靚位睇日落啦。大家只要校啱時間,就可以欣賞到好似明信片咁靚嘅大澳日落。其實喺大澳影日落真係有好多選擇,不過首選一定係虎山同新基橋。

大嶼山其實有好多鮮為人知嘅隱蔽靚景,等大家去逐一發掘㗎!

 

想影呢個虎山無敵Panorama醉人夕陽靚景,就要校啱時間啦!

 

想輕輕鬆鬆唔使行山都影到靚日落,新基橋就啱晒喇。

 

大澳夜景感覺寧謐,別有一番風味。

 

漫遊大澳 驗獨有節慶

就到中秋節,想感受節日氣氛,唔一定要同人迫,喺大澳參加一年一度嘅「大澳水鄉花燈節」。今年花燈節仲會有一個創舉,就係有1,000個手繪燈籠貫穿整個大澳,咁大家就可以輕輕鬆鬆沿住成個大澳慢慢行,散住步欣賞中秋花燈啦。同場仲有4米長嘅大蝦綵燈大型藝術裝置展覽,難得嚟到大澳又點可以錯過,就算夜少少坐巴士返東涌市中心都值回票價啦!

 

「大澳水鄉花燈節2019

亮燈日期:由7/9/2019至1/10/2019 晚上6:30至9:30

 

路線二:暢玩昂坪市集+中秋Glamping賞月+大澳行山小遊艇

 

至於好動嘅你,推介嚟大嶼山搭昂坪纜車展開兩日一夜玩樂旅程就滿足到你嘅要求,畀你放電玩足一個周末。每個都市人都知星期六可以瞓到自然醒絕對係一件幸福嘅事,然後才施施然起身出發去玩就夠晒舒服喇。

 

昂坪市集邊食邊玩

中午過後去到昂坪市集,當然唔少得要歎番個港式下午茶同埋出名嘅雞蛋仔先啦,之後就再去埋市集內360 VR體驗館玩餐飽。

 

去到市集就梗係要食勻咁多款地道小食啦!

 

充滿香港懷舊特色嘅360VR體驗館,畀你玩盡6種虛擬實景體驗同多媒體互動遊戲,以科技帶畀你耳目一新嘅玩樂體驗。

 

兩手fing-fing去露營

如果從未試過喺郊外賞月,今個中秋節就建議試下兩手fing-fing快閃去露營,賞月過一晚啦!今次推介地點就係YHA昂坪戴維斯青年旅舍(溫馨提示:記得網上預訂入住日期),距離昂坪市集、心經簡林、天壇大佛等景點,只有5至10分鐘路程,非常方便。呢個露營預訂服務專為冇露營經驗嘅你而設,畀大家唔使一袋二袋,毋須攜帶任何裝備,輕輕鬆鬆體驗野外露營同郊外賞月樂趣。想玩得豪華啲,可以一嘗升級版豪華露營(Glamping),專為熱愛大自然又想住得舒適的人而設。帳營備有枕頭床鋪、住客可無限次使用旅舍廚房及浴室,仲有Wi-Fi上網服務。生活起居所需用品齊全,保證可以輕鬆起行。

預訂詳情:https://www.yha.org.hk/en/hostel-booking/?id=831&channel

 

帳營是歐洲流行的波希米亞風,十分有格調。

 

帳營晚景充滿波希米亞風情

 

上山下海玩盡大澳

第二朝早起身,唞足精神直入大澳上山下海,第一站係位於大澳北面嘅虎山。搭巴士由昂坪市集去大澳,經永安街往楊侯古廟方向行,沿路小徑雖有碎石但算輕鬆易行,大概45分鐘慢慢就可以到達虎山觀景台前一段小橋。虎山橋可以睇到整個大澳水鄉同180度嘅無敵海景,同時能遠眺另一邊獅山象山景色。

 

大澳虎山係一條比較簡單易行嘅行山路線

 

玩完陸上路線,下午當然要落埋海啦。大家不妨選擇喺大澳坐小遊艇出海,從海上角度欣賞返大澳嘅獨特人文風光。

 

大澳水鄉最好係下午去遊玩
大澳水棚屋富有特色

 

昂坪360網站:www.np360.com.hk
查詢電話:3666 0606

最新吃喝玩樂資訊