【 自助餐 放蛇起底組 】直擊試食 $38黐線價素菜Buffet

誰說 自助餐 一定要大魚大肉先過癮?收到網民報料北角有間新食店,推出坊間少見的全素菜 自助餐 ,新張期內午市更是$38一位連加一!日日大排長龍兼爆場,我哋一於去實地考察,由排隊、派籌到食飽,來個足本報導。

排隊拎籌攻略

自助餐 分為午市及晚市,每次兩輪;午市為12:00-1:00及1:15-2:15,於上午11:00開始派籌;晚市則是6:00-7:30及7:45-9:15,籌號於下午五時開始派發,每次80個。放蛇臥底當日未夠十點半到達,已經有人開始排隊;10:30的時候人龍更延伸至長達3個舖位!當中不少是中年人士、以及擔埋凳仔嚟排隊的老人家,也有年輕人來湊熱鬧。

素菜_自助餐_1

踏入11:00,餐廳職員就出來派籌,什麼「朋友就到,幫佢拎埋」、「總共幾多位」統統無情講,一人一籌,憑籌入座。不過店員也很細心記低同行人數,以便座位安排。拎完籌,店員溫馨提示我哋唔駛企定定曬住等, 自助餐 開始前15分鐘回到餐廳即可,於是記者決定施施然去咖啡店坐陣先。

素菜_自助餐_2

換言之,想拎到籌的話,最好就早半個小時前來排隊;萬一拎唔到籌係咪要失望而回?咁又未必,餐廳每個時段會預留30個座位供即場入座,不過咁就真係要留守門口,睇下有無機會「執雞」喇。

睇到呢到,係咪想打退堂鼓呢?講多個好消息俾你知,我哋收到風,餐廳準備開放電話訂座服務,但只接受三日內的訂座,而且熱線暫時只在非繁忙時段(2:00-7:00)開放,有機會要打爆個電話。食個 自助餐 好似抽iPhone咁講彩數,真係要祝大家好運!

 

臨近12點就返去餐廳等入座,誰知門口迫滿人,原來是因為要事先付款,方能入座;而且亦有等後補位的客人在排隊及查詢,情況都幾混亂。看來入座安排上真的要改善一下了。

素菜_自助餐_3
這裡的餐檯都是四人檯為主,所以係絕對有機會要搭檯的。 自助餐 開始前,職員提示每人會分配一隻餐碟,不設換碟服務,而餐具也需在Buffet位自取,這樣是抵讚的,鼓勵大家環保嘛!

素菜_自助餐_4

有咩食 即刻Check it out!

Buffet area置於餐廳中央,唔同一般 自助餐 分類別、分位置。別以為素菜 自助餐 只得青菜、沙律,這裡的食物選擇也很多,接近二十款,大部份以中式為主,包括各類型的素肉炒菜、點心、粉麵、糕點等。質素也不錯,很家常小菜的味道,食得出無味精,也不會過濃或過淡。甜品及飽點更是必食的搶手貨。

素菜_自助餐_5
成檯都係齋! 逐一試晒都好飽肚架。
素菜_自助餐_6

無可否認,$38的價錢確是吸引,但大家切記不要抱著「拎到盡、搶多啲」的心態,試食當日就見盡無數「驚險場面」,包括全民瘋搶,夾到飛象過河、手持一鉗行勻全場、盤滿砵滿,甚至「雙碟出擊」,記者行完一圈返到位仲發現連碟都唔見埋!更加發現有客人夾得太多又食唔晒,大大碟直接倒落廚餘箱,實在太浪費。雖然是平價任食,但也要保持儀態,不要做大嘥鬼呀。

素菜_自助餐_7
私家匙羹都出動埋,超進擊!
素菜_自助餐_8
雙「碟」齊下
素菜_自助餐_9
有廚餘回收也不等於可以浪費食物呀!

總分:7 / 10

這頓 自助餐 值得俾高分,價錢超抵,$38平時落街買餸,或者食個兩餸飯都未必得,而且食物選擇多,味道亦不差,天然健康無味精;而且素菜 自助餐 坊間少見,此舉可以引起話題,吸引多啲人食素,抵讚!不足的地方就是入座及場內秩序管理上有點混亂;限時60分鐘的用餐時間也太倉促,若然能夠改善就更好了。但總括而言也是值得一試,平時飲食不均衡,間唔中食素健康一下也不錯。

溫馨提示:餐廳於7月30日後將以正價營業,午市$58、晚市$98,記得留意返。

無肉食

地址:北角堡壘街10-16號華曦大廈地下B舖(顯示地圖

價錢:(7月30日起)
午市 $58 (12nn – 1pm ; 1:15pm- 2:15pm)
晚市 $98 (6pm-7:30pm ; 7:45pm-9:15pm)
訂座電話: 2528 2368

 

延伸閱讀:
【 自助餐 放蛇臥底組 】文華東方 10大必試 3大中伏 甜品陣
【工廈食玩王】 葵興 $198 長腳蟹任食!

最新吃喝玩樂資訊