【飲食擂台A&B】連鎖店靚料 漢堡 大激鬥

正宗美式Burger店愈開愈多,個個用靚牛做 漢堡 ,搞到早前連麥記都要推出以安格斯牛製成的Create Your Taste自選 漢堡 嚟應戰。老麥行快一步,其他連鎖店又豈能慢!最近發現另外兩間連鎖 漢堡 店也加入戰團,推出高級牛肉 漢堡 ,一於battle下,等你用親民價食靚Burger。

 

A代表: MOS BURGER特選玉子沙律和牛堡

漢堡A

這款 漢堡 是MOS BURGER 香港限定款式,選用足料100g澳洲和牛來做漢堡扒,加上煎至半熟的玉子(即係麥記「豬柳強」果塊呀)、番茄、生菜,以及在醬汁上打破傳統,唔用現成醬汁,改用每日自家鮮製的他他醬,內含雞蛋粒、洋葱粒、酸瓜粒和芥末籽醬,一個 漢堡 分成六層,頗為巨型。

記者點睇?

「我食 漢堡 就最睇重漢堡扒,這款的和牛堡非常Juicy,牛味濃郁帶少量油脂,肉質好嫩,他他醬酸酸地仲好開胃。」

漢堡A_1a

同事A:「塊漢堡扒直頭係爆汁呀!麵包又軟熟。」

同事B:「食呢個包時候要好小心,因為好足料,一咬瀉晒出黎。」

牛肉:★★★★☆
醬汁:★★★☆☆
價錢:★★★☆☆ (單售:$30/個)

 

B代表:Burger King脆爆XT堡

另一款就是Burger King 期間限定的款式,用上100%的澳洲安格斯XT牛肉做漢堡扒,再以火烤熟,在兩邊麵包夾上脆炸洋蔥圈,再加上半溶化的芝士及煙肉條,整體外觀望落唔算巨型。

漢堡B

 

記者點睇?

「塊牛肉燒到黑晒,簡直係非洲漢堡扒呀,咬落好乾無肉汁;脆洋蔥畀啲醬整到淋晒,唔多合格喎!」

 

漢堡B_1

同事A:「無論係個包,定係漢堡扒,實在好硬同好乾;唯一可以讚的是漢堡扒內多咗些牛肉、牛筋粒,有咬口。」

同事B:「洋蔥有甜味,但醬汁都好甜,連牛肉味都蓋過埋。」

牛肉:★☆☆☆☆
醬汁:★★☆☆
價錢:★★☆☆☆ (單售:$39/個)

 

今次評判們好狠,兩秒就得出3:0的結果!只因為脆爆XT堡實在太乾,漢堡扒燒焦情況嚴重,浪費了整片安格斯牛肉;反而和牛堡表現非常平穩,除了保留到漢堡扒的肉汁,也在配料上花心思,每層材料都好Match,抵佢大熱勝出啦!

 

延伸閱讀:

最新吃喝玩樂資訊