元朗食乜好 承傳3代人情味 人龍車仔麵+無敵辣汁+30幾款配料
元朗食乜好 承傳3代人情味 人龍車仔麵+無敵辣汁+30幾款配料

元朗食乜好 承傳3代人情味 人龍車仔麵+無敵辣汁+30幾款配料

(Presented by 永年士多)

入元朗搵食,好多人都會集中火力主攻大馬路、雞地和又新街一帶,其實只要行過少少,教育路一樣有精彩好味嘅「景點級」地標美食等緊你!講緊嘅係喺元朗無人不識,有幾十年歷史嘅「永年士多」車仔麵。點解明明叫士多,但又賣緊車仔麵?仲要應街坊徇眾要求,衝出元朗去埋九龍同港島開設分店嘅呢?一切都源於品牌背後一個連繫三代人情味嘅香港故事。

永年士多
元朗總店內現時仍保留當年「永年士多」手寫大招牌,為煥然一新嘅環境保留一絲昔日情懷。

傳說中嘅元朗長龍車仔麵

真人真事,話說Dining 娜Call車由九龍到訪元朗「永年」當日,當司機得悉目的地係元朗「永年」時,已即刻忍唔住話呢間車仔麵好出名又好食!自己幾年前經元朗朋友推介試食下成為粉絲,仲經常跨區過嚟醫肚。隨後更坐言起行等到達目的地後,自己都要話要抖一抖嘆返碗車仔麵先繼續開工!(利申:司機當時未知Dining娜身份,純粹只想同車上乘客分享元朗美食。)

永年士多
自選餸麵系列,分別可選3餸、5餸、7餸同10餸!啱晒唔同胃口喜好嘅你,想食咩都可以自行配搭。樽仔奶茶同紅豆冰係招牌特飲,偶爾心多想飲晒兩樣,可以叫杯變奏版奶茶紅豆冰。
永年士多
想食齊10個餸,但又有選擇困難症?直接點碗已有齊最出名嗰10樣餸嘅「大碗麵」就得啦!

承傳三代元朗街坊人情味

話說上世紀60年代創辦人劉永年,喺屏山一帶以手推車販賣粥麵小食,到70年代搬入元朗現址改為經營士多,兼售腸粉、小食同汽水。直到80年代中期交由兒子劉偉雄接手,鑑於當時考慮到第三代已出世,為咗養妻活兒和應付供樓,於是決心增設車仔麵嚟增加收入。由於口味獨特出眾,所以一直好受元朗同鄰區街坊歡迎,仲成日出現人龍排隊嘅墟冚場面。

永年士多
經典4寶麵($51) ,豬腸爽嫩、豬紅香甜 、豬皮彈牙、蘿蔔無渣,全部都勁入味!抹茶紅豆冰($15跟餐,$25正價),加入細磨冰碎,冰凍得嚟又唔會沖淡飲品本身味道。
南乳豬手蝦籽撈麵 ($48),選用本地即日新鮮豬手烹調,豬手注滿南乳鮮咸豆香,豬手皮彈滑, 豬手肉腍嫩,加上元朗蝦籽麵同藥材湯底,成為近期大熱新品。

味道不變同時與時代接軌

「永年」近年已交由第三代劉逸軒同劉逸晉兩兄弟,齊心打理呢個承傳三代人嘅家庭品牌。鑑於時代環境急速轉變,兩兄弟決心要注入新氣象,由店面廚房、經營模式、製作手法,以至品牌形象等都嚟個大翻身。先喺屯門自設2,000幾呎中央廚房,確保喺安全衛生又高效嘅電氣化廚房裡面,統一處理所有食材前期製作程序,再喺第朝早將食材送至各分店。

招牌豬大腸,以獨家秘方醃製同炆煮3小時至入味腍身,再放入冰水裡面保持爽彈質感。每條原整分明、乾淨少肥膏(可選半肥瘦腸),入口爽嫩兼有微微藥材香。
韭菜豬紅係另一小食推介!豬血約一立方吋小截手指頭般迷你size,方便快速入味,配以炸蒜,更顯惹味!有別於其他大size豬紅只得表皮有味,呢度嘅豬血外爽內腍,由外至內都超入味。

湯底同辣汁成就永年精萃

隨機問幾位街坊有咩心水推介,發覺每個人答案都好唔同。負責人阿晉笑言:「每個人心裡面都有一碗屬於自己嘅車仔麵。」咁就等我哋重點講吓幾款只此一家嘅味道啦!首先湯底用咗大量老雞、豬筒骨、雞腳、果皮同十幾種藥材,每日熬煮三小時,湯清味濃兼有藥材香。秘製辣汁混合非洲野生小辣椒、大紅椒、印度鬼椒同幾十種香料調配,辛香層次分明、辣勁餘韻持久。

好多人為咗呢個秘製辣汁而經常幫襯,仲有 5種辣度,建議初次品嘗由細辣開始,再慢慢加辣。
腐乳通菜 $25,夏季是通菜當造季節,淋上豆香十足嘅同德興腐乳,香咸爽脆 。

30幾款車仔餸各有風味

店內有多達30幾款車仔餸選擇,每款都有專門配方調製,真正做到一餸一味!好似日賣過百斤嘅豬腸,就用咗花椒、八角、草果等製成嘅滷水汁煲至入味腍身,爽嫩少肥更零羶味。南乳豬手油潤豐沛;豬紅甜脆惹味;雞翼滿載陳年滷水香。蘿蔔精選皮薄肉嫩嘅當造蘿蔔,更只用最幼嫩嘅蘿蔔芯部分,再加入調味炆煮,因此嚼而無渣、甘香清甜!振興貢丸食落同樣有驚喜。

雞翼同雞翼尖先用老抽同八角生醃,再用陳年滷水汁煮至起膠,食起嚟咸中帶甜,十分滑嫩。

童年軼事營造味覺回憶

阿晉回想小時候哥哥同自己一放學,都會返到「永年」做功課、食嘢、玩耍同幫手。「嗰時父母要留喺舖頭忙於工作,爺爺就已退休幫手湊孫,每日都會煮飯俾哥哥同我食,陪我哋散步傾偈,感情深厚。當年舖頭有個好大嘅自助汽水櫃,裡面有成廿幾款飲料,不過總店翻新後汽水櫃已超額完成歷史任務,而我哋亦開始鑽研一系列自家製嘅港式特飲。」

樽仔奶茶($17)每日鮮製,混合幾款茶王嘅茶香,入口順滑。奶茶紅豆冰($25)紅豆由中央廚房熬煮至起沙,香甜綿滑。
無論係傳統嘅紅豆冰,抑或新派嘅抹茶紅豆冰 (各$25), 都係炎炎盛夏開心消暑首選。
檸檬可樂、懷舊菠蘿冰(各$25)同屬港式經典特飲,分別選用新鮮檸檬同菠蘿,散發天然果香。
翻新後元朗總店改走摩登簡潔路線,並將原來摺枱摺椅改成卡位、吧枱等,更有迷你私人空間。
「永年」元朗總店座落教育路路口,非常顯眼易找。

永年士多(元朗總店)

地  址: 元朗教育路88號寶城洋樓地舖2~4號
電  話: 2477 3816
營業時間:12:00nn~10:00pm(最後截單時間:9:30pm)

最新吃喝玩樂資訊