銅鑼灣食乜好   元朗三代老字號車仔麵    港島區新店+中央廚房+每日鮮製
銅鑼灣食乜好   元朗三代老字號車仔麵    港島區新店+中央廚房+每日鮮製

銅鑼灣食乜好 元朗三代老字號車仔麵 港島區新店+中央廚房+每日鮮製

(Presented by 永年士多)

喺元朗開業30幾年嘅「永年士多」,除咗係車仔麵老字號外,更加係好味嘅代名詞!好多元朗同埋鄰區街坊都由細食到大,甚至大個咗帶埋下一代嚟繼續幫襯,用行動證明呢度嘅車仔麵有幾吸引!最近「永年」就喺銅鑼灣開咗港島區第一間分店,以後港島人唔駛再過海去尖沙咀,或者入元朗搵食啦!

中央廚房確保味道質素

湯底係車仔麵嘅靈魂,而「永年」嘅湯底出名湯清味濃,入口有淡淡藥材香。細問之下,原來係選用咗大量老雞、豬筒骨、雞腳、果皮,以及十幾種藥材,每日新鮮熬煮三小時而成。另外,呢度嘅豬腸、豬手、豬紅、豬皮、蘿蔔、雞翼、雞翼尖、貢丸、魚旦等配料,以至各款麵底同調味醬料都係香港製造,而且每款配料都有獨家配方嚟調製,真正做到一餸一味!為咗確保食物保衛生同味道質素,仲喺屯門自設2,000幾呎中央工場預先製作處理,再每朝早送到各分店。

大碗麵 ($67),一碗有齊10 款配料,啱晒心多人士同大胃王!記得要配埋茶味濃郁,每日新鮮製造嘅樽仔奶茶呀!
經典四寶麵($51), 一次過食勻入味豬大腸、爽甜豬紅、彈牙豬皮同無渣蘿蔔。建議配埋掛湯力一流嘅元朗油麵同招牌清湯一齊食。

必食招牌本地新鮮豬腸

「永年」嘅豬腸勝在夠入味又乾淨少肥膏,一咬落外皮有鮮爽口感,再咬就食到裡面有幾嫩滑腍身,皆因佢哋堅持選用本地新鮮豬大腸最嫩部位,而非一般冰鮮貨色,再早一日喺中央工場完成清理工序後,用花椒、八角、草果、薑等香料同藥材,加入上湯製作滷水汁煲至入味腍身,同時又可以去除羶味。由於實在太受歡迎,所以每間分店每日都會消耗過百斤豬腸!

招牌豬大腸每條原整分明、乾淨少肥膏,入口更係爽嫩兼備,仲有少許藥材香。如果鍾意食肥腸可以喺落單時要求。

本地新鮮南乳豬手撈麵

南乳豬手係呢度另一必食推介!選用本地新鮮豬手製作,豬皮零脂肪兼含有豐富膠原蛋白,營造出好似啫喱咁彈滑嘅口感;而連骨豬肉就炆得入味腍身,並且散發住香濃嘅南乳、八角等香料風味。加上南乳含豐富植物蛋白,又可以增進食慾同健脾開胃,所以好受女士們受歡,更加適合炎熱夏天食用。除咗單點外,仲可以配乾撈蝦籽麵嚟食,蝦籽麵仲係用元朗麵廠出品,每條麵條都有大大粒蝦籽,絕對真材實料,食落仲有淡淡蝦籽香。每份南乳豬手蝦籽撈麵都會配埋一碗清湯,夠晒貼心。

南乳豬手蝦籽撈麵 ($48),豬手炆得非常入味且滿口膠原蛋白。每條麵條都有大量蝦籽,配埋藥材湯底,既平衡味蕾又好味養顏。

 

雖然豬手係中央廚房預早一日醃製調味,但大廚每日都會喺早上8點返到舖頭,準備同處理後期工序。

自家製辣汁+樽仔奶茶+懷舊特飲

除咗湯底同配料,醬汁(尤其係辣汁)喺整碗車仔麵裡面,都擔當住一個好重要嘅角色。「永年」嘅秘製辣汁可以話係一絕!以非洲野生小辣椒、大紅椒、印度鬼椒等唔同辣勁嘅辣椒,再混合幾十種香料調炒而成,所以辛香辣勁十足且持久不散!秘製辣汁仲分勁、大、中、小,同埋細辣五個等級。當食到舌麻身熱時,最好就係飲返杯冰凍嘅港式特飲,好似樽仔奶茶、紅豆冰同菠蘿冰嚟解辣降溫,而呢度所有特飲都係自家調製,保證新鮮無添加。

奶茶紅豆冰($25),當香濃奶茶撞上粒粒紅豆同黑白淡奶,成為最經典嘅懷舊港式特飲,大推!另一款抹茶紅豆冰 ($25),就充滿日式風味。
大大粒紅豆細綿香甜,每日喺中央廚房熬煮至起沙,再送到分店備用。
懷舊菠蘿冰($25),用上新鮮菠蘿調製,清新得嚟,更富有鮮果獨有嘅甜香。
樽仔奶茶($17)每日新鮮製作,並以幾款茶王混製,茶味香濃、入口順滑。

長龍車仔麵非浪得虛名

雖然銅鑼灣「永年」每日中午12點先營業,但Dining 娜到訪當日就見到11點幾,已經開始有客人喺舖頭門前徘徊同排隊,開舖前更已經出現長龍,整個午膳時段舖頭都係人頭湧湧,難怪「永年」由元朗總店開始,到尖沙咀分店同銅鑼灣新店,都俾人冠以「長龍車仔麵」嘅稱號啦!新店以清新簡約木系做主調,又喺落地玻璃位加設吧枱,予人感覺更加乾淨整潔同坐得舒服。

新店請嚟專人將整個用餐空間,設計成輕鬆寫意嘅Café感覺 。
店內掛有元朗總店為中心,同埋其他周邊元朗地標同人文特色嘅漫畫。
收銀處後的百子櫃,每格都寫上用嚟調製上湯,以及各款配料嘅香料同藥材名字。
店內放有像真度極高嘅元朗總店,同埋新張誌慶棚架嘅模型。
銅鑼灣新店鄰近港鐵、巴士同小巴等樞紐,交通四通八達。

永年士多(銅鑼灣店)

地址:銅鑼灣謝斐道482號信諾環球保險中心地下7-9號舖

電話:2477 7298

營業時間:星期一至日 12:00 – 22:30 (截單時間22:00)

最新吃喝玩樂資訊