外遊要萬無一失 解答5大徵費印花常見疑問
外遊要萬無一失 解答5大徵費印花常見疑問

外遊要萬無一失 解答5大徵費印花常見疑問

踏入2019年嘅下半年,唔知大家有咩外遊計劃呢?想去欣賞下世界各地嘅自然風光? 定係遊覽下名勝古蹟,順道去埋購物呢?無論選擇去邊都好,外遊旅行要玩得開心又放心,當然要確保自己嘅旅程受到全面嘅保障。其中一樣可以保障到大家嘅外遊旅程就係旅遊業賠償基金(「賠償基金」)喇。

唔知大家有無留意今年三月初新假期有篇想出去玩得開心又放心 計劃離港外遊前5個必讀旅遊業賠償基金注意事項!呢?相信大家讀完篇post後,都會對賠償基金有咗一定嘅認識。今次我哋就同大家進一步了解賠償基金嘅重要一環 — 徵費印花,解答5大徵費印花常見問題!

1. 徵費印花係咩嚟?有咩作用?

為咗令外遊旅客可以得到賠償基金嘅保障,《 旅行代理商條例 》(第 218 章)要求持牌旅行社需要就每筆已向外遊旅客收取咗嘅外遊費,繳付相等於外遊費全數0.15% 嘅印花徵費。喺持牌旅行社繳付印花徵費後,旅行社所發出嘅收據上就會見到印咗一個清晰顯示徵收金額同日期嘅印花。例如,如果你俾咗旅行社$12,000購買香港至東京機票連當地酒店住宿套票,張收據上嘅印花就應該顯示已繳交$18 嘅印花徵費。如果大家俾咗外遊費後發現收據上無徵費印花、印花模糊不清或者印花徵費額不足(少於已付外遊費全數嘅0.15%),就要記得提你地幫襯嘅旅行社糾正返呀。

以往持牌旅行社都會用傳統印花機為收據蓋上徵費印花。不過喺社會邁向電子化嘅大趨勢下,印花徵費系統亦都跟隨呢個大趨勢,邁向電子化。由2018年6月1日開始,旅遊業賠償基金管理委員會已推出電子印花徵費系統。 電子印花徵費系統發出電子印花,以取代由傳統印花機發出嘅印花。雖然傳統印花蓋印機已經由2019 年 7 月 1 日起停用,但由印花機發出嘅印花依然有效!大家可以留意下列印花嘅式樣 。

由電子印花徵費系統發出嘅徵費印花式樣:

由傳統印花機發出嘅徵費印花式樣:

 

2. 購買什麽外遊服務先會喺收據上蓋上徵費印花?

根據《旅行代理商條例》,旅客向持牌旅行社購買下列全部或任何兩項旅遊服務後,便屬於外遊旅客:

1.由香港出發去內地或海外嘅交通;

2.喺香港境外任何地方嘅住宿;

3.由持牌旅行社安排喺香港境外任何地方嘅活動。

持牌旅行社需要向外遊旅客發出蓋上徵費印花嘅收據。

根據以上嘅定義,旅客如果向持牌旅行社只購買以下四類之中任何一類嘅旅遊服務,相關收據就唔會蓋上徵費印花:

1.喺香港境外集散嘅一天團;

2.單獨購買機票、船票、巴士票;

3.單獨購買酒店住宿;

4.購買冇明確指定可以兌換上段所提及任何兩種或以上旅遊服務嘅旅遊現金劵或優惠券。

3. 持有已蓋上徵費印花收據嘅外遊旅客,可以獲得賠償基金什麼保障?

如持有已蓋上徵費印花嘅收據,外遊旅客可以獲得賠償基金兩類嘅保障:

1.損失外遊費嘅保障:呢個情況一般發生喺持牌旅行社倒閉嘅情況下。如果外遊旅客購買外遊服務後持牌旅行社倒閉,賠償基金可以為受影響旅客提供所損失外遊費90% 嘅特惠賠償。

2.喺外遊活動中遇上意外傷亡嘅保障:如果萬一唔好彩,外遊旅客喺持牌旅行社提供或舉辦嘅外遊活動中意外傷亡,係可以得到總數達 $300,000 嘅特惠賠償以報銷當地醫療、殮葬/遺體(包括骨灰)運返香港以及親屬因旅客傷亡而往訪當地所招致嘅實際開支。

4. 外遊旅客透過網上旅行社購買外遊服務,會唔會受到賠償基金嘅保障?

只要旅客買咗多過一項外遊服務(即係第(2)題所講嘅三項服務中嘅兩項或以上),無論喺持牌旅行社嘅實體店或者網站購買,都會受到賠償基金嘅保障。

但係大家如果透過網站購買外遊服務,記住要留意該網站是否持牌旅行社。 另一方面,如果喺網上購買旅遊服務,亦應該喺付款後盡快向旅行社索取印花收據。

5. 既然外遊旅客已受到賠償基金嘅保障,是否仍需購買旅遊保險?

雖然賠償基金能夠為外遊旅客提供一定嘅保障(即係第(3)題所講嘅兩類保障),但始終保障嘅項目同金額有限,外遊旅客出發前應該買番份適合自己嘅旅遊保險,雙重保障自己嘅旅程!

想知更多關於旅遊業賠償基金嘅詳情,可以瀏覽www.ticf.org.hk

而有關於徵費印花的問題,可以聯絡香港旅遊業議會,電話:2969 8188。

最新吃喝玩樂資訊