【 自助餐 放蛇臥底組 】文華東方 10大必試 3大中伏 甜品陣

知道香港人鍾意食Buffet,我哋決定化身「 自助餐 鬼見愁」,將城中 自助餐 完全起底!好壞無所遁形!最近聽講快船廊的Buffet dinner有個甜品陣,內有超過40款甜品,簡直係衝著全港女性而來,挑戰你的胃口和卡路里!究竟質素如何?我哋就派人去會一會呢個甜魔,同你來個匯報。

現場目測浮誇甜品陣

文華東方酒店 Mandarin Oriental 甜品花園自助餐 1

甜品分兩層擺在眼前,加埋雀仔、鳥籠、花朵砌得靚靚,成個花園咁,絕對是影相呃Like、Selfie之選。網上盛傳共有48款甜品咁多,即刻要求主席點甜品數先!當日就數到37款,部份甜品有重複,好彩類別都算多,朱古力、布甸、Cheesecake、鮮果都有一系列選擇,齋食甜品都飽。雪糕仲係文華東方自家製,誠意滿分!

文華東方 自助餐 甜品_3

與其說呢棵係士多啤梨樹,不如話佢係一個紅色炸彈。一粒粒士多啤梨用牙籤串好,一拔出嚟就食得,夠方便。不過直接插在發泡膠波上面,真係令人有些少猶豫,會唔會包張保鮮紙好啲呀?

文華東方 自助餐 甜品_4

同場另一炸彈,上面插住的是雙色棉花糖;仲有貝殼蛋糕巨塔,全部衝擊你的視覺。

a3

a6

部分甜品仲隱藏喺呢個花園入面,好似這朵Macaron花、香檳啫喱杯和不同款的松露朱古力咁,要細心啲搵呀。

其實37款甜品真係逼死人!花多眼亂揀唔到之餘,食晒又怕肥,點算好?即睇以下甜品Top 10來個精華遊。
No. 1 層層疊雪糕
高水準的自家製雪糕,厚身軟滑,好重奶香,冰感都足夠,重點是可以叫甜品師傅幫你整個雙球、多球雪糕,好食又好玩。

文華東方 自助餐 甜品_5

文華東方 自助餐 甜品_2

No. 2 香草焦糖燉蛋
微微燒至脆卜卜的焦糖,配上Creamy、滑溜的燉蛋,好好味,師傅要不停Refill。

No. 3 檸檬松子仁餡餅
酥香牛油皮,同內裡酸酸甜甜的檸檬餡好夾,記者最鍾意呢個!

No. 4 焗蘋果撻
蘋果煮得很軟身,好香肉桂味,連埋牛油脆皮,口感豐富。

No.5 藍梅Cheesecake
文華東方的招牌甜品,實在無得輸,濃濃芝士味,唔會整得太實,食落唔膩。

No.6 日本雪梨Cheesecake
雪梨好清甜,整件蛋糕味道好清新,是不嗜甜朋友的輕怡之選。

No. 7 熱情果Cheesecake

食得出用了很濃縮的熱情果汁來做,酸酸地幾解膩。

No.8 Tiramisu
軟滑的Mascarpone cheese中滲出咖啡香及rum酒味,齒頰留香。

No. 9 芒果布甸
芒果肉很多,而且好香,味道唔假,加埋椰汁西米,非常泰國style。

No. 10 朱古力慕斯
朱古力醬再加兩層不同濃度的慕斯,味道好rich!朱古力迷必食!

世事無完美,所以甜品都有陷阱。以下呢三款都算係這個甜品陣的敗筆,大家小心。

文華東方 自助餐 甜品_6

1. 扮綿花石膏糖

話明係綿花糖,照道理應該是軟綿綿,一咬feel到唔對路,硬到敲落碟都有「咯咯聲」,而且無甜味,非常奇怪。

2. 藥水味濃 士多啤梨蛋糕

士多啤梨甜品向來都是伏味濃之選,因為真係好易變成藥水味,這款就係其中之一,唯一可以說的就是海綿蛋糕部份幾軟熟。

3. 硬過石頭窩夫

本想讚一讚窩夫有多種醬料可揀,港式格仔餅三寶有齊,點知食落好硬好乾,完全無格仔餅應有的濕潤蛋糕質感,扣晒分!

講返 自助餐 的其他部份,凍海鮮的選擇非常多,除了基本的凍蝦、蟹腳、青口之外,仲有龍蝦、鮑魚、生蠔,難怪六點半一開始就排長龍搶海鮮,好彩廚師們都Refill得快,抵讚!
文華東方 自助餐 甜品_7
不過全部犯下一個通病!就是淡而無味,新鮮度足夠,但完全食唔出海鮮應有的鮮甜味,有點失望。反而即切刺身有驚喜,三文魚肥美厚身,啖啖魚油香,帶子也非常鮮甜,要一再Encore。

文華東方 自助餐 甜品_9文華東方 自助餐 甜品_10

熱食方面都有十多款可供選擇,大部份以中式為主,最近仲玩懷舊主題,有沙田雞粥及燒乳鴿。雖然很欣賞廚師諗主題的用心良苦,但兩者味道平平無奇,唔算突出,而且有幾多人會在 自助餐 食粥呢?
文華東方 自助餐 甜品_11
每人奉送慢煮鵝肝一件,味道甘香啖啖邪惡油脂,若果可以無限任食就更開心。

總分:8 / 10

總括而言,這頓 自助 餐屬高分之作,甜魔攻擊確實邪惡,款式比一般 自助餐 甜品還要多,味道也符合酒店級水準;熱食方面味道不錯,無乜中伏。唯一要改善的地方是凍海鮮淡而無味,生蠔若然是即開就更好,環境亦比較迫,聽到晒旁邊食客講緊乜,有啲嘈。不過$548食到高質的美食,仲要超多靚甜品,真係抵到笑!

快船廊

地址:中環干諾道中 5 號香港文華東方酒店閣樓(顯示地圖

供應時間:
6:30pm – 10:30pm (星期一至四)
6pm – 8pm ; 8:30pm – 10:30pm (星期五、六及公眾假期)
6:30pm – 10pm (星期日)

收費: 成人 $548 小童 $368 (星期一至四)
成人 $588 小童 $398(星期五至日及公眾假期)
*另設加一服務費

【延伸閱讀】
$168任食 點心 連鮑魚一隻!四小時回本放題 【銅鑼灣】
【掃街王】 尖沙咀 歎最Elegant小食甜品

最新吃喝玩樂資訊