無伏!6月野餐注意事項 編輯推介野餐必備物品!
無伏!6月野餐注意事項 編輯推介野餐必備物品!

無伏!6月野餐注意事項 編輯推介野餐必備物品!

最近天氣非常適合野餐,繼今日推介了添馬公園作野餐地點之外,編輯就整合咗野餐人士必備物品!咁就一定玩得開心又放心!趁呢幾日天氣咁好,記住搵埋親朋戚友一大班人一齊去野餐啊!

撰文:GW|來源:新傳媒資料庫

1)飲用水、毛巾:

最近天氣非常炎熱,加上添馬公園將會係熱門野餐地點,人多擠迫嘅時候都特別容易流汗!所以補足水份是非常重要嘅一環!最好帶定大量飲用水補充水份,仲可以留意到時有無流動水站,方便補水啊!仲要記住帶毛巾抹汗幫助散熱,以免中暑啊各位!

飲用水非常重要

2)衣著:

至於衣著方面,前文都有提到,因為天氣非常炎熱,亦有大量報告指出,穿著「白色」衫有助減少吸收熱能,將會令身體較為涼快,仲無咁惹蚊!所以大家記住要穿著白色衫去進行野餐活動啦!最好再帶多一件衫去替換!

衣著要白色

3)雨傘:

雨傘既可以遮陽,亦可以擋雨,喺各種關鍵時候可以達到保護自己嘅效果,私心推薦黃色,夠搶眼!

雨傘

4)食物:

由於野餐是長期進行嘅活動,活動期間會消耗不少嘅體力,所以一定要帶定足夠乾糧如麵包餅乾等,到時記得要補充體力啊!

食物

5)口罩、太陽眼鏡:

由於添馬公園附近有不少大馬路,帶定口罩就唔怕吸入廢氣同塵埃,戴埋太陽眼鏡就唔怕太陽曬親自己雙眼啦~仲可以帶幾分神祕感添!

口罩、太陽眼鏡

6)雪成冰嘅水樽:

天氣炎熱,用雪成冰嘅水樽可以提供散熱嘅作用,退咗冰仲可以拎嚟飲,況且野餐點可以無冰嚟雪嘢飲呢?

雪成冰嘅水樽

7)芭蕉扇:

烈日當空,帶定風扇仔就唔怕熱啦~大家記得帶定多兩三個,仲要叉足電,先可以保證進行到長時間嘅野餐活動啊!

芭蕉扇

8)行動電源:

行動電源(尿袋)可以提供後備電源比手機或者風扇仔,手機要叉足電先可以隨時留意最新嘅資訊,例如野餐狀況最新嘅Update,仲要用嚟聯絡身邊親朋戚友,齊齊野餐!

行動電源

希望大家可以開開心心咁進行野餐活動,帶定多兩條毛巾抹汗散熱,最緊要係注意安全,祝大家玩得開心及順順利利,Good Luck!

新假期最新野餐地點推介:添馬公園 記得入去睇詳情啊!

最新吃喝玩樂資訊