Jan Jan Kushikatsu
Jan Jan Kushikatsu

Oishii!灣仔食乜好!世界串揚代表 正宗大阪風味 薄脆黃金炸衣裹藏誘人鮮味

飲食

廣告

(Presented by Jan Jan串揚)

大阪公認係「日本國民廚房」出名美食種類繁多,更憑美食多到「食到飽」(Kuidaore)特色吸引各地遊客蜂湧到訪!提到大阪最出名嘅平民美食,一定非有百年歷史嘅串揚(串炸)莫屬!講講吓,大家係咪開始諗起之前去新世界通天閣時,周圍都瀰漫住陣陣串揚酥炸香味嘅情景,身體裡面嘅美食雷達開始發出訊號?先唔駛急住上網搵機票飛大阪,而家嚟灣仔「Jan Jan Kushikatsu串揚專門店」(Jan Jan )就得啦!

大阪串揚名牌Jan Jan Kushikatsu 首設海外分店

熱愛大阪或關西美食嘅你應該有聽過,甚至幫襯過「Jan Jan」呢個大阪串揚品牌,佢哋首家店舖源自新世界通天閣,而家係大阪同東京有13家分店,而香港更加係品牌首個海外分店,之後亦有喺上海開設分店,朝向「世界串揚代表」嘅目標版圖進發,以關西美食宣揚日本文化。好多人會形容串揚係B級美食,皆因一眾串揚專門店都以服務社會各階層為主,以平實親民、價廉味美同選擇多樣,呢三大特點做招徠,B級其實係形容緊佢哋有幾親民貼地同受大眾歡迎。

60款串揚串燒美食居酒屋

「Jan Jan」三年前進駐香港,除提供40幾款串揚美食外,仲加入20款串燒,更依循日本料理不時不食嘅傳統,按時令增添各種季節性食材同飲料,畀大家可以品嘗到該種食材全年最佳風味同營養,同時又畀到成日幫襯嘅熟客每次嚟到時,既食到平日喜愛嘅串揚同串燒,同時又有其他味覺新驚喜,呢個都係好多日本居酒屋嘅不成文款客之道。負責人石先生表示,「Jan Jan」香港特別結合串揚、串燒同居酒屋,三種日本酒足飯飽嘅特色元素,以迎合香港客人嘅口味同市場喜好。

究竟「Jan Jan」嘅串揚有幾好食,可以「炸」到衝出本土,成為國際串揚代表?Dining 娜上星期就親身到訪過佢哋嘅居酒屋同廚房觀察,同時向負責人同行政主廚請教,綜合得出以下結論。

從串炸過程看日匠廚藝精神

首先「Jan Jan」由空間到食物,以至客人嘅衣服,都唔會出現或沾有任何油膉味!呢點係極少數炸物店能夠做到嘅,好處係可以令客人專心享用眼前嘅食物,好好投入當下嘅用餐環境氣氛。細問下,原來佢哋特別嚴選3種優質植物油嚟調配成專用炸油,加上全程低溫炸物絕不冒(白)煙,既保留食材最純粹嘅味道同本質,更唔會釋出任何有害物質,稱得上係聰明用油。同時令串揚做到酥香脆薄,卻不腍不膩嘅特點,就算食幾多串都唔會有滯膩感。

黃金炸衣包住最好食材

上佳嘅串揚要做到炸衣酥脆甘薄猶如金色和紙!炸衣既要鬆化乾身、金黃酥脆,又要呈現出食材原有模樣。第一口咬落去會即時感受到食材嘅細緻原味,而餘下部分依然係炸衣同食材緊密貼合唔會剝落。要做到呢點真係好靠師傅嘅經驗、手勢同臨場發揮,當然靚食材同秘密配方都好緊要啦!幸好香港分店有日籍行政主廚猜山英樹助陣,嚴格監控同訓練每位廚師遵守每個串炸程序,並按照每款食材特質,即場調控炸漿同炸粉嘅完美比例,兼且精準掌控炸油溫度同時間。

行政總廚駐港嚴監出品

喺大阪總店已服務十幾年嘅日藉行政主廚猜山英樹,經驗豐富熟練、廚藝精準扎實,嚟港前喺日本專責監控同訓練廚師,確保所有分店達到品牌最佳質素。佢同負責人石先生均表示,日本料理向來祟尚減法原則,藉簡單細緻嘅烹調手法,去烘托潤飾出食材最純粹嘅滋味;而好嘅串揚會透過炸衣去提升食材本身嘅鮮度、味道同質感。炸衣同食材同等重要,所以會由日本及世界各地,嚴選引入最合時節嘅時令特產。

備受本地及日本食客捧場

呢度有好多日本食客光顧,反映出佢哋有幾正宗地道,而且由午餐、晚餐到宵夜時段都幾乎滿座,加上好多客人都會飲酒,氣氛非常好,而每款酒都會有指定酒杯配飲,方便客人聞到該酒嘅最佳風味。同時每款串揚、串燒都有專用調味醬料,因行政總廚曾喺日本嘅法國餐廳工作,所以部分醬汁會搵到淡淡嘅法式風味。高麗菜係自助任食,建議喺下一道串揚送上前食用,方便清新味蕾。由於醬汁係「同浸」,所以只能喺未食時蘸點醬油,嚴禁「翻浸」呀!

最後想講想呢度嘅CP值真係幾高!午市平均約$100幾;晚市平均大概$300幾,仲可以揀套餐或者自選。由於人氣度高,建議嚟之前記得先打電話訂位呀!

Jan Jan Kushikatsu串揚專門店(灣仔店)

地址:皇后大道東100號2樓

電話:2157 1408

營業時間:

午市:星期一至五 12pm-3pm

星期六及日 12:30pm-3:30pm

晚市:星期日至四 6pm-11pm

星期五及六 6pm-12am