旺角食乜好 火車站旁深夜食堂＋四川風味串燒＋港式三重芝士撈丁＋創意甜品串燒
店面採用開放式設計，其中一邊全天候面向大街，開揚寫意又有半露天感覺。
串燒小店燒出熾熱人氣
「安安燒」可以話係大隱隱於熙來攘往鬧市嘅串燒小店，雖然店面不大，但就因為精選優質食材、自家秘製調味、堂食不限時間、價錢經濟實惠，同埋坐得舒服自在等條件優勢下，成為同區性價比高企嘅人氣食店！店內分別有三大皇牌種類推介，包括：四川麻辣風味串燒、港式三重芝士撈丁及自家創研特色甜品！每道串燒菜式嘅份量都屬輕量級，無論係一人快閃獨食，定係結伴同行開心聚餐，都可以點叫多幾樣唔同種類試食。由於堂食唔會有時間限制，所以就算一大班人約食飯，但仲有人未收工，都可以照樣安心邊食邊等，所以每晚都座無虛席、客如輪轉。
獨家研發多款調味秘方
除咗精選優質食材外，呢度大部分肉類（牛肉、豬肉同雞肉）都會先用秘製醬汁醃好調味，然後再拎去燒烤，令肉類保留獨有嘅鮮味同滑嫩多汁。負責人表示，為咗營造五味紛陳嘅味覺層次，特別由四川引入多款香料，調製出獨家孜然辣粉，灑喺每種肉類和蔬菜串燒上，形成只此一家、叫人無可抗拒嘅安安燒風味！至於海鮮類，除咗每日由專人到街市漁檔精選當日時令海鮮外，更利用香港人最鐘意嘅金蒜同銀蒜，配以少許葱花同紅辣椒嚟調味同提鮮，一樣好食到叫人舔舔脷！ 
「安格斯肉眼牛柳串」牛味濃郁、肉嫩多汁，醮滿秘製孜然辣粉調味後更加惹味，係人氣推介！ 
「金銀蒜蓉燒生蠔」新鮮得嚟又飽滿多汁，加上有金蒜同銀蒜等香料調味，好有港式海鮮風味！ 
「蒜蓉燒扇貝」同樣灑滿金蒜、銀蒜同葱椒等香料提鮮，鮮甜惹味。
法式印象三重芝士撈丁
川燒以外，呢度嘅「三重芝士撈丁」一樣咁出名同吸客。由芝士愛好者嘅老闆喺留學法國期間，嘗遍各式芝士後親自創研。混合咗藍芝士、巴馬臣芝士、車打芝士，呢三種味道較濃，但風味不一嘅法式芝士，再加入秘製香料混調而成，因此「芝」味濃郁出眾、口感幼滑飽滿、味道層次豐富。撈埋啱啱煮起、質感Q彈嘅出前一丁上面，簡直係Comfort Food中嘅極品！除咗三重芝士原味之外，仲有黑松露菌醬（法式）、辣辣士拉差（泰式）同惹味鰻魚汁（日式），三款口味選擇。 
「辣辣士拉差三重芝士撈丁」一次過食到藍芝士、巴馬臣芝士、車打芝士，同埋泰國經典士拉差辣辣醬，混醬撈出前一丁嘅震撼味覺衝激，想挑戰味蕾者必試！ 
「燒韮菜」（前）同「惹味蒜蓉生燒茄子」（後）兩者口感一爽脆、一腍滑，並分別以秘製香料粉同招牌金銀蒜蓉調味燒製，既富有蔬菜嘅清新甜味，又可以中和返食得太多肉類嘅油膩感。 
「惹味黑松露墨魚滑」每日由人手新鮮現打而成，件件都成吋厚，好有睇頭同嚼勁！仲加入矜貴黑松露增加味道層次，啱啱燒熟時更加係香氣四溢，客人最鍾意就係用刀叉切嚟食。
自家港式BBQ特色甜品
呢度嘅特色甜品更係一絕，充滿香港人對飲食天馬行空嘅創意，好似用蘇打餅夾住棉花糖嚟燒烤，味道唔單止超夾，而且仲令人想起BBQ時燒棉花糖，同埋細個食蜜芽糖夾餅嘅畫面！而另一款燒朱古力香蕉，香蕉嘅軟糯加上濃郁嘅朱古力醬，兩種甜味超夾，而且好味又有營養，大人、小朋友同老人家都好啱食。想飲返杯助興，推介呢度嘅日本手工啤酒畀大家！ 
「甜蜜脆脆糖燒－棉花糖夾餅」（前）棉花糖夾餅好有BBQ風味！「甜蜜脆脆糖燒－朱古力香蕉」（後）好味健康又有營養！兩者都係老闆自創嘅特色甜品嚟㗎。 
