攜咖啡進店被勸告 野蠻西客逼職員飲「口水尾」｜網絡熱話
廣告
咖啡醒腦提神，唔少人都鍾意拎住杯周街行，但唔喺間間商店都俾客人飲住野飲行，尤其疫情下，格外嚴格！喺國際品牌工作嘅網民投稿至「西店Hi客之道 Hispitality Secret」Facebook專頁，分享自己返工時有客人唔理勸告，堅持一邊飲咖啡一邊行店舖，仲要鬧返樓主無禮貌。服務性行業果真最受客人氣！
撰文：Evita｜圖片：西客之道、網上圖片
西客帶咖啡入店邊行邊飲
有網民投稿至Facebook專頁，指公司貨品價值不菲，門口玻璃貼上「不准飲食」標誌，以免客人會整邋遢，有啲客人被提醒後都會守返規矩；唯獨早前輪到網民負責企門口，有兩個中年女人攞住連鎖咖啡店咖啡行入舖頭。
網民：「唔好意思啊，裏面唔可以飲食，可以飲埋先或者放入袋。」
女人A重覆兩次：「飲？點飲啊！」
網民：「唔緊要，或者可以擺入袋先，離開再飲，唔使即刻飲晒。」
逼職員飲「口水尾」咖啡
網民表示佢再講多次「唔好意思，麻煩擺返入袋先」，點知就被呢兩個女人指住鬧無禮貌，更話：「飲！你飲啊你飲畀我睇啊！我宜家邊有偷你嘢啊，你咁無禮貌唔怪得企呢度啦！」亦要求搵經理。
而網民就表示從未話過呢兩位客人偷嘢，亦話門口位係每位同事輪流企，唔一定係低級職員先要做呢個位。
經理到場後，呢兩位客人就鬧公司有問題，搞到佢哋睇唔到個標誌，又話網民當佢哋係賊。最後經理同網民了解事件途中，女人B就大鬧網民：
「你返工要喊嘅就唔好返，你仲差我一句對唔住啊！你着住件制服就代表住公司，代表住國際知名品牌，我趕時間㗎，不過都好多謝你畀個機會我反映你公司有咁嘅問題！」
網民：唔應該道歉！
網民則表示完全無喊過，亦無諗過要喊，但可惜「顧客永遠是對的」，所以最後都係同佢哋講「對唔住」。
而其他網民睇完後都表示「唔應該道歉」、「香港人從來都唔守規則」等等。
撰文：Evita｜圖片：西客之道、網上圖片
