主題樂園
主題樂園

遊主題樂園遇排隊截龍 怪獸家長:收聲呀!我要投訴呀!

熱話

廣告

「無品客」的重災區,除了飲食業,就是主題樂園。日前就有一對港爸港媽帶著小朋友準備入場遊玩,不過還未入場,已在購票櫃位出事,跟職員發生口角之餘,還爆出金句:「收聲呀!我而家要投訴呀!」、「我要見管理層」等,真是氣勢迫人!

撰文:B|圖片:西客之道 Hispitality Secret、新假期

樂園售票處截龍 怪獸家長向職員發火

日前一名自稱在主題樂園兼職的網民,在Facebook專頁「西客之道 Hispitality Secret」投稿,講述自己在售票處遇到「無品客」的事件。話說有一對夫婦帶著小朋友,正在其中一個購票櫃位排隊購票入場,遇上櫃位夠鐘截龍,職員請他們住其他櫃位繼續排隊,怎料兩位家長立刻「怪獸上身」,向職員大發雷霆,期間更多番爆出野蠻言論,令人汗顏。

根事主講述,樂園售票處一共設有24個櫃位,多數不會全部開放,而是因應等候人數、員工用膳時間來調節,事發當天,由於接近員工午膳時間,職員就把其中4個櫃位的排隊人龍「截龍」,趕不及排隊的客人會被安排到仍然開放的櫃位繼續排隊,就在這個時候﹐事主遇上一對發難的夫婦。

客人發火:收聲呀你!我要投訴呀!我要見管理層!

當事主與同事向夫婦二人解釋為何需要「截龍」時,夫婦連環爆出野蠻金句,雙方的對話如下:
客:收咗?即係點呀?
職員:唔好意思呀,因為我哋呢邊會暫停運作,或者你可以過返對面嗰邊吖唔該你……
客:點解話收咗呀?都未收?
職員:唔好意思呀,呢邊會暫停運作,所以我哋截咗龍…..
客:即係未收啦!咁點解你唔做埋我哋先呀?我哋帶住個小朋友咁辛苦,天氣又熱,都係一張半張飛啫!我哋喺門口停車場嗰度等咗咁耐度無車位,個停車場咁遲開你又唔通知我哋,你叫你哋啲管理層落嚟,我要俾佢哋睇到你哋管理得幾咁差呀!
職員:真係好唔好意思,但係就算其他人話佢哋都係一張半張,我哋都係會叫返其他人去對面,因為呢邊真係已經收咗……

客:都未收!你哋淨係企喺度唔做嘢,點解你哋做野咁差㗎!叫你啲管理層落嚟,睇下你哋做得幾差呀!
職員:我都好明白你嘅感受……
客:你明咩啫?你明你就而家俾我續埋飛先啦,一張半張都唔做埋佢!你哋啲管理層喺邊呀?
職員:如果你希望投訴嘅話,前面轉左嗰個counter幫到你,不過都係要排隊。
客:咁你都要我排隊呀?你唔好同我講嘢,我要見管理層!管理層喺邊呀?
職員:或者兩位冷靜少少,俾我講兩句?
客:我唔要同你地講野!我要見管理層!
職員:嗱咁樣啦,你……
客:收聲呀你!我要投訴呀!
職員:你俾我講埋先好無?如果你想投訴又唔想排隊嘅一係我而家幫你mark返低啲資料先好無?嗱我都明白可能出面樂園交通部同事可能做得唔係幾好,咁我都代佢地講返聲唔好意思先……

客:收聲呀!我而家要投訴呀!你都無聽我講野!我實投訴晒你地咁多位!
(原文轉自「西客之道 Hispitality Secret」)

網民「突破盲腸」

面對如此霸氣的客人,不停話要見管理層,不過網民就齊齊「突破盲腸」,搞笑地表示該樂園的「管理層」在美國⋯⋯

還有地址、地圖提供!真貼心!

還有這位,真是「終極突破盲腸」,樂園「規矩」當然是管理層決定啦!一眾「小薯仔」職員,又怎能「話事」呢?