尖沙咀貓咪Cafe 粉紅花牆 貓咪藝術創意料理＋巨型雪糕芭菲｜出街搵食

撰文：Sakura 攝影：Tony

尖沙咀粉紅花牆Cafe 貓店長坐鎮

尖沙咀貓咪Cafe「樂園」最近新裝修，新增鮮豔花牆供食客打卡拍照，而菜式方面都搞搞新意思，其中廚師發辦的藝術餐單，用上5至7款新鮮時令的食材，在大大的碟上放滿鮮花，再大玩飄煙效果，相當吸引！最誇張是大怪獸雪糕，四層雪糕球，加上棉花糖、波板糖、士多啤梨等不同甜品和水果，睇落勁巨型，一大班人一起分享就最過癮！飲品同樣吸引，迷你浴缸載著玫瑰菠蘿柚子特飲，更設有開關按鈕，從花灑噴出玫瑰特飲，得意之餘，感覺非常治癒！另外場內有2隻貓店長寶寶和多多坐鎮，陪你渡過開心時刻！

多款打卡藝術餐單

「廚師發辦」由大廚決定5至7款新鮮時令食材，包括牛柳粒、鵝肝多士和心型大蝦都相當受歡迎。大大的碟上放滿鮮花，又有乾冰製造飄煙效果，更細心用朱古力醬畫上語句，打卡拍照一流！食客也可預早指定繪畫字句，為友人慶祝生日或紀念日，母親節就快到，大家都可以預早訂定和媽媽慶祝一番！

仙氣龍蝦海鮮意大利飯，波士頓龍蝦拆肉後焗製，肉質鮮嫩多汁。另外還有帆立貝、藍青口、魷魚、香脆龍脷魚等時令海鮮，鋪在意大利飯上，款款新鮮肥美，食客於星期一至四更可以優惠價$298享用。

甜品控一定要挑戰一下這款大怪獸雪糕，超特大巨型4層雪糕球，除了有不同口味雪糕外，還配上厚厚的忌廉，放上滿滿的棉花糖、波板糖、可可脆片、蜜桃、士多啤梨等不同甜吃和水果，勁誇張，一大班人一起分享就最過癮！而且所有雪糕都是低糖、低脂，減肥都無問題，另外食客也可預早訂心意牌，為友人慶祝生日。

勁得意！這個迷你浴缸載著玫瑰菠蘿柚子特飲，撒滿玫瑰花碎，還有乾冰仙氣從旁散出，浴缸上的小花灑噴出特飲，好有意境，飲落花果香味濃郁，創意十足的迷你浴缸特飲，拍照打卡一流！

這幾杯造型滿分的熱朱古力非常吸睛，熱朱古力上放上立體小動物造型的棉花糖，加上濃厚奶泡，口感香滑，又可愛又治癒，同樣是呃like之選！

樂園
地址：尖沙咀北京道65-69號環球商業大廈2樓205-06室（顯示地圖）
電話：2739 3039
營業時間：星期一至四 2:00pm-11:00；星期五 2:00pm-12:00am；星期六、日 12:00pm-11:00pm