深水埗巨型炸雞髀!新開掃街小食店 鹹蛋黃雞翼+魚皮|出街搵食
深水埗巨型炸雞髀!新開掃街小食店 鹹蛋黃雞翼+魚皮|出街搵食

深水埗巨型炸雞髀!新開掃街小食店 鹹蛋黃雞翼+魚皮|出街搵食

深水埗最近又有掃街小食店三肥美食進駐!由3位老闆主理,主打成塊面咁大的生炸巨型雞髀,還有一系列鹹蛋黃小吃,每款鹹香惹味,睇見就想食啦!

撰文:Sakura 攝影:Tat

三個肥仔創業 招牌巨無霸炸雞髀

自稱三肥黃先生、阿權與另一位朋友,都是相識多年,大家是同學亦是同事,工作一段時間後,覺得人生茫茫,並無出路,於是萌生一起創業的念頭。其中阿權曾任職中菜館十多年,故主力炮製及設計小吃,他們覺得小吃要有噱頭才能吸引客源,最後就推出現時最受歡迎的巨型炸雞髀和一系列鹹蛋黃系列。

(左)老闆黃先生及(右)老闆阿權

生炸雞髀 大過塊面!

說到招牌生炸雞髀,老闆坦言沒有什麼秘訣,只是想令這街頭小吃變得有點特色,所以選擇Size較大的雞髀,一來夠份量有睇頭,二來雞髀夠厚肉,每一口都啖啖肉。每隻生炸大約10分鐘,當雞髀表面呈金黃色,新鮮出爐的巨無霸炸雞髀就誕生啦!吃落好香脆,勁多肉汁,而且size無得輸,仲大過塊面!

巨無霸炸雞髀仲大過塊面!
生炸巨無霸炸雞髀$24/隻
咬落好香脆,勁多肉汁,好juicy!
雞髀好厚肉,食落啖啖肉,好正!

鹹蛋黃系列 足料黃金雞翼+魚皮

另外在店內大賣的﹐是鹹蛋黃系列,包括單骨雞翼、魚皮、鮮菇、四季豆及燒賣五款,鹹蛋黃醬選用新鮮鹹蛋黃、牛油,再炒至半溶狀才放到小吃上。每份鹹蛋黃系列小吃,大約用上2粒鹹蛋黃製成,相當足料,每啖都充斥著鹹蛋黃香,味道濃郁,鹹香惹味!。

鹹蛋黃醬選用新鮮鹹蛋黃,每日即製。
每一份小吃大約用上2粒鹹蛋黃製成,勁足料。
鹹蛋黃雞翼$30/份
記者推介!老闆特意選用單骨雞翼,希望鹹蛋黃更能滲透雞肉中,每一口都食到鹹蛋黃香,美味十足!
鹹蛋黃魚皮$30/份
勁香脆,每啖都食到鹹香味,佐酒絕配!
椒鹽腸粉$15/份
老闆得意之作,將腸粉炸至脆卜卜,再灑上滿滿的椒鹽粉,口感香脆又煙韌;另可沾上泰式辣醬或沙律醬,別一番風味。
椒鹽燒賣$12/10粒
記者推介!燒賣粒粒爽帶香,外層香脆,入口煙韌,不錯!
麻辣雞翼尖$20/份
適合喜歡吃麻辣的人試,食落充滿麻香,辣辣地,香口刺激。

三肥自選車仔麵 軟腍牛腩+豬手

除了多款惹味小吃,同場更有足料飽肚的車仔麵,有多款配料可供選擇,其中最具人氣的就是秘製牛腩和南乳豬手,兩款都炆至軟腍入味,再配上自家熬製豬骨湯,好豐富飽肚!

三肥自選車仔麵$38
牛腩和南乳豬手,軟腍入味,牛柏葉食落爽口,湯底濃郁,大滿足!

最新吃喝玩樂資訊