6年內呃盡200萬！ 中年港男被中國妓女騙財又騙心
廣告
網上情騙案成日都聽，但原來現實中都會有機會發生！近日TVB《東張西望》就訪問一個中年港男黃生，佢喺節目中苦訴自己6年以來，俾一名喺香港搵食嘅中國妓女騙財騙心嘅經歷，斷斷續續一共損失咗近200萬人民幣！
撰文：PC | 圖片來源：TVB《東張西望》截圖
召妓時認識 與妓女談心講自己內心世界
根據黃生講述，自己喺多年前召妓時識咗呢個內地妓女。隨住日子耐咗大家變得熟稔，開始保持聯絡，而該女子仲慢慢向黃生講下自己嘅內心世界。楚楚可憐嘅身世令到黃生慢慢跌入陷阱，仲越踩越深！
妓女噓寒問暖 成功融化事主
妓女一得閒嘅時候就會向黃生噓寒問暖，表達自己嘅關心，好似喺黃生做嘢時會提佢記得飲水同小心工作等等，仲會加上錫錫同心心等emoji，輕鬆就融化咗黃生寂莫的心！
得到信任 妓女開始進攻
當妓女完全得到黃生嘅信任之後，就開始露出真面目！妓女開始問黃生借錢去整容，幾個星期後更表示唔會還錢，但黃生竟然好大方咁同對方講：「自己攞得出就當幫你啦。」後來妓女更加展開攻勢，動之以情咁同黃生講自己媽媽有癌症，需要一筆錢去幫媽媽醫病。仲同黃生講其實為咗籌備醫藥費先會去成為妓女，用極慘故事去軟化黃生嘅心！
一借再借 冇錢起屋又有病
呃完一次又一次嘅妓女依然唔知足，仲講自己鄉下有地但冇錢起屋；其後仲話自己肝臟有個腫瘤，前後一共要二十幾萬人民幣俾佢醫病同起屋。黃生聽完毫不猶豫一次又一次咁匯款去大陸。除此之外，原來該名妓女債務纏身，黃生除咗借錢，仲默默咁幫佢還債。
期望開花結果 妓女打蛇隨棍上
隨住日子，黃生對該名妓女嘅愛已經不能自拔，仲希望呢段感情可以開花結果。佢於是向妓女求婚，叫佢從良，妓女一口答應，即時追問禮金，黃生亦好快咁俾咗20萬。其後妓女表示打算轉行，叫黃生打本俾佢去做小生意，黃生依舊心甘情願出錢俾妓女達成願望。
騙徒現形 竟然係個有家室嘅女人！
喺呢六年來，該名妓女加加埋埋已經借咗黃生200萬人民幣，直到妓女獅子開大口，要求黃生俾多300萬先會同佢過人世，黃生先識醒，搵私家偵探跟蹤對方。最後發現原來妓女係一個有家室嘅女人嚟！最後呢位妓女知道身分敗露，即刻block咗黃生，從此人間蒸發。
事主：我唔係蠢！
俾妓女呃錢呃感情，但黃生表示自己並唔係蠢，而係出於善良嘅心。更表示自己有信心可以將被騙嘅200萬賺返嚟。希望佢加油啦！
