壽司
壽司

元氣變爭鮮?巴打爆朋友將壽司偷龍轉鳳食差價!

熱話

廣告

一大班朋友聚會同大家一齊share嘢食好平常,但點都冇諗過會有人趁機掠水!近日有巴打喺討論區大爆同朋友開party夾份買嘢食,有人自動請纓負責買壽司,但點知食嘅時候覺得有啲問題,後來先發現party入面嘅元氣壽司竟然換咗做爭鮮?!

撰文:PC | 圖片:新假期資料室、網上圖片

開開心心搞Party 發現壽司唔對路

有巴打喺連登討論區網站,呻同朋友聚會,有人主動拍哂心口話負責買壽司返嚟,大家都話冇問題,仲要求哂唔同口味,而對方都話會盡量滿足人家嘅要求。

壽司
一大班朋友開party,夾錢買嘢食都少不免。

到party當日,朋友買咗5盤各40件壽司,不過大家發現每盒壽司都係同樣得6款,而壽司嘅質素都一般:有人覺得壽司飯好硬,或者飯身比平時食開嘅少,大家都開始覺得唔對路,但見壽司盤同豉油芥末都係同平時元氣包裝一樣,於是都冇理到繼續食。

真・元氣聖誕外賣到會資訊: 聖誕到會外賣推介2020 (持續更新) 最新連鎖餐廳優惠

壽司
朋友拍哂心口話會買壽司,但發現味道都同平時唔一樣。

Party完結路過爭鮮有所發現…

去到party完咗之後,巴打同另外2個朋友走嘅時候見到爭鮮,先至發現入面賣嘅壽司同頭先食嘅一模一樣!為咗試真啲佢哋決定一人買一件試下,點知發現味道同口感都同頭先party食嘅係完全一樣!

壽司
巴打走嘅時候見到爭鮮,發現壽司款式有啲熟口面。 圖片來源:爭鮮

 

巴打仲話,party完咗即晚,大家都影低買咗咩食物嘅收據夾錢,唯獨是嗰位朋友將每樣嘢食喺whatsapp打低再send返出嚟。巴打補充「大家都明咩事,今次錢照夾。」但就開咗一個新group,入面冇呢位買壽司偷龍轉鳳嘅朋友喇。

壽司
巴打事後開咗新group,但就冇咗位壽司朋友喇。

真・元氣聖誕外賣到會資訊: 聖誕到會外賣推介2020 (持續更新) 最新連鎖餐廳優惠

網民回應

有網民就回應巴打,直言「你呢位朋友幾有心機偷龍轉鳳。」、「百幾蚊睇清一個人,抵!」,更講笑話如果嗰位朋友坦白話自己手頭緊,大家都會幫手,唔洗做埋呢啲嘢咁話~

壽司
網民話用百幾蚊可以睇清朋友都幾抵。 截圖至連登討論區
壽司
網民都笑指巴打嘅朋友好有心機!截圖至連登討論區