蟻俠
蟻俠

【香港好去處】率先試玩 !迪士尼蟻俠遊樂設施 主題商品+特色美食

香港好去處

廣告

香港迪士尼樂園最新Marvel主題遊樂設施「蟻俠與黃蜂女:擊戰特攻!」,將在2019年3月31日開幕。為了隆重其事,迪士尼就邀請了飾演「蟻俠」的保羅活特、「史達科技展神盾局科技館」總工程師宣萱在今日出席開幕典禮。記者更加率先試玩,想知遊戲點玩,又有咩新即刻去文!

原文:Sunday Kiss|撰文:Kammy|編輯:Kel |攝影:Cliff 、Roy |圖片來源:新傳媒資料庫

蟻俠現身詳情:【香港好去處】迪士尼蟻俠遊樂設施3月31日開幕 !蟻俠、宣萱今現身香港揭幕儀式

 

「蟻俠與黃蜂女:擊戰特攻!」3月31日正式開幕!

萬眾期待,首個以蟻俠和黃蜂女為主題的遊樂設施,將會在3月31日正式開幕。遊戲承接「鐵甲奇俠飛行之旅」的故事,香港依然受到Hydra攻擊,蟻俠與黃蜂女聯手保護香港!而遊客亦要幫手,保護儲存高度機密資料的數據核心,鑽入機械蟲的盔甲,摧毀機械蟲!遊客要坐上「突擊」戰車,利用手上的電磁脈衝槍,「殺死」機械蟲!在遊戲中,更有一個重要人物出現,想知係邊個?睇到最底先開估!

睇完片就去到保安裝備庫,呢度就有唔同外星生物同武裝科技嘅重要研究項目,同好多唔同嘅收藏品,大家小心唔好亂掂。再行前少少,就要上戰場啦!各位遊客會坐上神盾局最新研發嘅「突擊」戰車,當中配備電磁脈衝槍,盡情打壞人。提提大家,成個遊樂設施總共有150個射擊目標,以多種唔同形狀呈現,到時會有5種機械蟲,大家只要攻擊機械蟲嘅弱點就可以獲得分數!

去到數據核心實驗室會有一隻「巨型巢蟲」,佢有3條巨型機械臂,喺度圍攻數據核心,真係好危險呀!不過唔緊要,呢個時候會聽到蟻俠同黃蜂女嘅廣播:「我們必須將你們縮小,進入巢蟲體內,從內到外攻擊Zola。」咩話?縮細我哋?!

去到巢蟲體內,四周都係大型電熱板、記憶體等,上面仲有好多唔同大小形狀嘅弱點,呢個時候緊係要攞起枝槍盡情咁射啦!期間仲有蟻俠同黃蜂女嚟睇下大家安唔安全添!

記者玩後感:

「本身都知道「蟻俠與黃蜂女:擊戰特攻!」係由「巴斯光年星際歷險」改建而成,整體大致上同「巴斯光年」嘅玩法差唔多,不過今次戰車冇得好似之前咁自己較點郁,但係佢就不停自轉,成日都會射失,加上機械蟲會成日消失,就算較啱位,都未必射中,不過就啲射擊位比較清晰,所以都容易攞到分!」

蟻俠與黃蜂女主題小食

除咗新嘅遊樂設施之外,仲有以蟻俠與黃蜂女做主題嘅美食,依家就帶大家睇下啦!

戰隊漢堡套餐(蟻俠)$149(推出日期:即日起至6月30日)

兒童雞扒漢堡包$85

蟻俠與黃蜂女主題甜品

「科技館禮品店」售賣Marvel主題商品

「科技館禮品店」已於去年開幕,依家大家可以買到逾70款蟻俠與黃蜂女嘅獨家商品及多款主題美食,粉絲玩完記得去埋shopping呀!

黃蜂女T-Shirt

蟻俠Cap帽 $158起

蟻俠太陽眼鏡 $158

蟻俠/神盾局主題杯 $98

鍾意儲門票嘅粉絲留意!樂園入場門票將會於3月換上全新「蟻俠與黃蜂女」設計,必儲呀!

「蟻俠與黃蜂女:擊戰特攻!
開幕日期: 2019年3月31日(星期日)
地點:香港迪士尼樂園