直接拎走其他人袋外賣？！麻煩客人嫌等太耐 擅取他人外賣！引網民熱議！｜網絡熱話
廣告
近年我們買多了外賣，如果是夜收工，又餓又攰都會選擇去快餐店，貪佢快、靚、正啊嘛！有網民投稿至「西客之道 Hispitality Secret」，分享去麥當勞買外賣時遇到嘅麻煩顧客，而呢位網民更加忍唔住開聲鬧爆「麻煩友」！
撰文：Evita | 圖片：新傳媒圖片庫｜資料來源：西客之道 Hispitality Secret
麻煩客人嫌等太耐 直接拎走其他人外賣
日前有網民投稿至 Faebook 專頁，指有一晚去到一間通宵營業嘅麥記，由於夜間比較少職員返工，所以出餐慢啲，而職員都有同佢講需要等10分鐘。當網民企喺度等嘅時候，突然有客人同佢點同一個餐。
當職員整好網民嗌嘅外賣時：「九件雞加大攞走。」
網民表示嗰位客人好順手攞咗個餐，而職員就話：「先生個餐唔係你㗎，你嗰個仲整緊。」點知就被客人鬧喇。
客人：「點會唔係我？我咪係叫呢個餐囉。」
職員：「你係叫呢個餐，但有另一位先生（投稿網民）早過你叫咗，你放返低等下喇。」
點知客人大發脾氣：「咩叫呢個嗰個？攞咗就係我架喇，仲要我繼續等？你而家咩態度啊？半夜都要畀人鬧，你前世未畀人鬧過啊？」
自己個餐畀人拎走咗，網民都不甘示弱鬧返麻煩客轉頭。
（原文含粗言穢語，文字經過修飾）
網民：「你攞咗人個餐仲喺度發勞嘈？你而家攞住我個餐，我都未話你，你喺度發老脾？」
網民繼續鬧爆麻煩客「堂堂大男人幾十歲恰𡃁仔，個個都喺度等，你有特權㗎？」然後麻煩客放返低個餐就走咗，網民就話唔知佢最後有無返嚟拎個餐，但係因為呢個麻煩客搞到又要等多幾分鐘拎過個新嘅。
網民：有好多客人成日偷外賣！
事件擺上Facebook後引起網民關注，有唔少人都話親身試過畀其他人拎走過飲品，有人更話做過麥記收銀，憶述曾經有客人試過拎走人哋畀錢加大嘅橙汁。
呢位網民就話唔明點解職員唔叫號碼，不過就有人回應，其實等嘅時候唔玩電話，自己留意住個餐幾時出都得。
大家又有無試過拎錯人餐或者人哋拎錯你餐嘅經歷？
撰文：Evita | 圖片：新傳媒圖片庫｜資料來源：西客之道 Hispitality Secret
