嫌等太耐拎走其他人外賣被發現 麻煩客:「攞咗就係我架喇!」
嫌等太耐拎走其他人外賣被發現 麻煩客:「攞咗就係我架喇!」

嫌等太耐拎走其他人外賣被發現 麻煩客:「攞咗就係我架喇!」

唔少人諗唔到食乜都會選擇去快餐店,貪佢快、靚、正啊嘛!近日就有網民投稿至「西客之道 Hispitality Secret」,分享去麥記外賣時遇到嘅麻煩顧客,而呢位網民更加忍唔住開聲鬧爆「麻煩友」!

撰文:Evita | 圖片:新傳媒圖片庫

麻煩客嫌等太耐拎走其他人外賣

日前有網民投稿至Faebook專頁,指有一晚去到一間通宵營業嘅麥記,由於夜間比較少職員返工,所以出餐慢啲,而職員都有同佢講需要等10分鐘。當網民企喺度等嘅時候,突然有客人同佢點同一個餐。

當職員整好網民嗌嘅外賣時:「九件雞加大攞走。」

外賣
示意圖,非涉事分店

網民表示嗰位客人好順手攞咗個餐,而職員就話:「先生個餐唔係你㗎,你嗰個仲整緊。」點知就被客人鬧喇。

客人:「點會唔係我?我咪係叫呢個餐囉。」

職員:「你係叫呢個餐,但有另一位先生(投稿網民)早過你叫咗,你放返低等下喇。」

點知客人大發脾氣:「咩叫呢個嗰個?攞咗就係我架喇,仲要我繼續等?你而家咩態度啊?半夜都要畀人鬧,你前世未畀人鬧過啊?」

示意圖,非涉事分店
示意圖,非涉事分店

自己個餐畀人拎走咗,網民都不甘示弱鬧返麻煩客轉頭。

(原文含粗言穢語,文字經過修飾)

網民:「你攞咗人個餐仲喺度發勞嘈?你而家攞住我個餐,我都未話你,你喺度發老脾?」

網民繼續鬧爆麻煩客「堂堂大男人幾十歲恰𡃁仔,個個都喺度等,你有特權㗎?」然後麻煩客放返低個餐就走咗,網民就話唔知佢最後有無返嚟拎個餐,但係因為呢個麻煩客搞到又要等多幾分鐘拎過個新嘅。

事件擺上Facebook後引起網民關注,有唔少人都話親身試過畀其他人拎走過飲品,有人更話做過麥記收銀,憶述曾經有客人試過拎走人哋畀錢加大嘅橙汁。

呢位網民就話唔明點解職員唔叫號碼,不過就有人回應,其實等嘅時候唔玩電話,自己留意住個餐幾時出都得。

大家又有無試過拎錯人餐或者人哋拎錯你餐嘅經歷?

最新吃喝玩樂資訊