帶母親到診所睇醫生 不肖子當場喝斥：「你唔好死喺屋企！」

撰文：Evita | 圖片：劇照、Facebook截圖

不肖子帶母親到診所睇醫生

日前診所助護「珍寶豬」喺Facebook分享工作見聞，指有位先生同個篤住拐杖嘅婆婆到診所，先生同「珍寶豬」講：「我阿媽要填呢份表，仲話要照肺」而「珍寶豬」如常要求出示身份證明文件以作登記。點知先生對住該名婆婆：「喂，身份證啊！」

該名婆婆慢慢摷身份證嘅時候，阿仔就表現出唔耐煩：「搵張身份證都咁耐，你阻住人啊！」到「珍寶豬」拎到身份證登記時，呢位先生就不斷催問要搞幾耐。

隨後，「珍寶豬」同先生講有關報告要幾三四日先有，先生嫌慢之餘又話只係打幾隻字話無事都要等咁耐，點知戲肉就嚟喇！

婆婆：「你急咩啊？我都就死㗎啦！等幾日你都等唔到啊？」

先生：「你死還死啊！唔好死喺屋企啊！你過到去先好死啊！」

婆婆：「你就咁我驚死喺屋企啊？」

先生：「間屋仲要賣㗎！你死都死出去啦！」

婆婆：「係囉係囉，屋呀？你老豆走嗰時你話會照顧我，佢先肯寫你名啊！」

先生：「我而家無照顧你啊？我有畀飯你食有畀衫你著啊！我係叫你唔好死喺屋企，死出去啫！你死喺度個價會冧㗎！定係你要我賣埋個老婆去補你死喺屋企條數呀？幾廿歲人用吓個腦啦！」

對於呢位不肖子同年紀老邁嘅媽媽對答，「珍寶珠」奉勸呢位先生嘅太太都係搵機會走佬好啲喇！

有網民就留言指呢個仔仔而家咁樣，他朝君體也相同，更大鬧佢係人渣！