得返100蚊現金 要生存11日！港男呻：「無錢到連工都返唔到」網民立即熱心相助！｜網絡熱話
廣告
一到月尾窮係好正常，「錢唔係萬能，但係無錢就萬萬不能」，相信有唔少人都聽過呢句說話。現今要生存嘅最基本就係要「錢」，近日就有網民問得返100蚊點生存到11日，引嚟眾多網民打暖心回應，究竟係咩事呢？
撰文：Evita | 圖片：連登討論區、電影劇照
全身只剩100蚊現金！
有網民喺連登討論區以「身上得番100蚊點生存到下個月7號」為題，指屋企人欠債，自己每月收入$19,000，但係還錢就已經要畀萬六蚊，無錢到有時連工都返唔到，仲話有個互有好感嘅女仔，都因為驚害咗人而唔夠膽去追人。」引嚟大批網民熱議。
根據樓主所講，就話係阿爸個朋友走咗佬，而阿爸堅持出糧畀員工先將鋪頭結業，於是唔夠錢都寧願借筆錢返嚟出糧畀人先。而家阿爸有返酒樓幫補吓，但係返得唔多。
有網民就話100蚊都可以捱到3-4日，仲叫樓主問朋友借住幾百蚊先，但係樓主就話唔敢再問朋友借，再道出自己住元朗要去日出康城返工，每日車費都已經要$60。
有人就提議樓主將屋企雜物賣埋出去，點知樓主話電腦都一早賣咗，無嘢再可以賣喇！真係去到山窮水盡咁喎⋯⋯
大家見樓主連車錢都無，於是紛紛留言叫樓主畀聯絡方法，請佢食飯又或者借住錢畀樓主先。
對於大家雪中送炭嘅舉動，樓主決心地拒絕，稱自己只係想訴苦而非乞錢！
關懷樓主嘅大有人在，但係同時都有人話樓主講大話，指出由元朗去到日出康城都只係$25.3，來回絕對唔使超過$60。此時樓主就話計錯咗，係$50先啱。無論樓主有無呃人都好，都睇得出網民們都真係好有愛啊！
撰文：Evita | 圖片：連登討論區、電影劇照
