外遊要萬無一失 解答5大徵費印花常見疑問
外遊要萬無一失 解答5大徵費印花常見疑問

外遊要萬無一失 解答5大徵費印花常見疑問

(presented by the Travel Industry Compensation Fund Management Board)

又辛苦工作咗一年,係時候去吓旅行放鬆吓!嫌香港唔夠冬天?咁就要飛去北海道、北歐等冰天雪地感受一吓冬日嘅氣氛喇!相反怕凍想避寒?咁就可以選擇去吓東南亞地區過番個和暖嘅冬日假期,泰國、越南、新加坡等任君選擇!不過無論選擇去邊都好,去旅行要玩得開心又放心,當然要確保自己嘅旅程受到全面嘅保障。其中一樣可以保障到大家嘅外遊旅程就係旅遊業賠償基金(「賠償基金」)喇。

唔知大家有無留意最近新假期有篇想出去玩得開心又放心 計劃離港外遊前5個必讀旅遊業賠償基金注意事項!呢?相信大家讀完篇post後,都會對賠償基金有咗一定嘅認識。今次我哋就同大家進一步了解賠償基金嘅重要一環——徵費印花,解答5大徵費印花常見問題!

1. 徵費印花係咩嚟?有咩作用

為咗令外遊旅客可以得到賠償基金嘅保障,《 旅行代理商條例 》(第 218 章)要求持牌旅行社需要就每筆已向外遊旅客收取咗嘅外遊費, 向香港旅遊業議會繳付相等於外遊費全數0.15% 嘅印花徵費。喺持牌旅行社繳付印花徵費後,旅行社所發出嘅收據正本上就會見到印咗一個清晰顯示徵收金額同日期嘅印花。例如:如果你畀咗旅行社HK$10,000購買香港至東京機票連當地酒店住宿套票,張收據正本上嘅印花就應該顯示已繳交HK$15 嘅印花徵費。如果大家畀咗外遊費後發現收據上無徵費印花、印花模糊不清或者印花徵費額不足(少過已付外遊費全數嘅0.15%),記得提你哋幫襯嘅旅行社糾正番呀。

目前嚟講,大部分持牌旅行社都係用緊傳統印花機蓋印。不過喺社會邁向電子化嘅大趨勢下,印花徵費系統亦都跟隨呢個大趨勢,逐步邁向電子化。由2018年3月1日開始,旅遊業賠償基金管理委員會已引進電子印花徵費系統,作為印花蓋印機以外嘅另一種發出印花方法。截至2018年12月底,已經有超過100間持牌旅行社使用電子印花徵費系統。喺現階段,電子印花徵費系統並未完全取代印花蓋印機,由電子印花徵費系統發出嘅電子印花同傳統印花機發出嘅印花擁有相同嘅法律效力!大家可以留意下列印花嘅式樣 。

由傳統印花機發出嘅徵費印花嘅式樣:

由電子印花徵費系統發出嘅徵費印花嘅式樣:

2. 購買甚麼外遊服務先會喺正本收據上蓋上徵費印花?

根據《旅行代理商條例》,旅客向持牌旅行社購買下列全部或任何2項旅遊服務後,便屬於外遊旅客:

  • 由香港出發去內地或海外嘅交通;
  • 喺香港境外任何地方嘅住宿;
  • 由持牌旅行社安排喺香港境外任何地方嘅活動。

持牌旅行社需要向外遊旅客發出蓋上徵費印花嘅收據正本。

根據以上嘅定義,旅客如果向持牌旅行社購買以下4類之中任何一類嘅旅遊服務,相關收據就唔會蓋上徵費印花:

  • 喺香港境外地方集合並解散的一天團;
  • 單獨購買機票、船票、巴士票;
  • 單獨購買酒店住宿;
  • 購買冇明確指定可以兌換上段所提及任何兩種或以上旅遊服務嘅旅遊現金券或優惠券。

3. 擁有已蓋上徵費印花正本收據嘅外遊旅客,可以獲得賠償基金甚麼保障?

如擁有已蓋上徵費印花嘅正本收據,外遊旅客可以獲得賠償基金兩類嘅保障:

  • 損失外遊費嘅保障:呢個情況一般發生喺持牌旅行社倒閉嘅情況下。如果外遊旅客購買外遊服務後持牌旅行社倒閉,賠償基金可以為受影響旅客提供所損失外遊費90% 嘅特惠賠償。
  • 喺外遊活動中遇上意外傷亡嘅保障:如果萬一唔好彩,外遊旅客喺持牌旅行社提供或舉辦嘅外遊活動中意外傷亡,係可以得到總數高達 HK$300,000 嘅特惠賠償以報銷當地醫療、殮葬/遺體(包括骨灰)運返香港以及親屬因旅客傷亡而往訪當地所招致嘅實際開支。

4. 宜家唔少外遊旅客都會選擇透過網上旅行社購買外遊服務,呢班外遊旅客會唔會受到賠償基金嘅保障

只要旅客買咗多過一項外遊服務(即係第(二)題所講嘅三項服務中嘅兩項或以上), 無論喺持牌旅行社嘅實體店或者網站購買,都會受到賠償基金嘅保障。

但係大家如果透過網上旅行社購買外遊服務,記住要留意該網上旅行社係唔係持牌旅行社。 另一方面,如果喺網上購買旅遊服務,亦應該喺付款後儘快向旅行社索取印花收據。

5. 既然外遊旅客已受到賠償基金嘅保障,是否仍需購買旅遊保險

雖然賠償基金能夠為外遊旅客提供一定嘅保障(即係第(三)題所講嘅兩類保障),但始終保障嘅項目同金額有限,建議外遊旅客出發前亦要記得買番份適合自己嘅旅遊保險,雙重保障自己嘅旅程!

徵費印花

想知更多關於旅遊業賠償基金嘅詳情,可以瀏覽https://www.ticf.org.hk

而有關於徵費印花的問題,可以聯絡香港旅遊業議會,電話:2969 8188。

最新吃喝玩樂資訊